Búgin Astanada fýtboldan FIFA Series 2026 týrnıri bastalady

ASTANA. KAZINFORM — Alǵashqy oıynda Qazaqstan men Namıbııa quramalary kim myqtyny anyqtaıdy. Bul jóninde Qazaqstan fýtbol federatsııasy málim etti. 

Match elordadaǵy «Astana arena» stadıonynda ótedi.

17:00-de bastalatyn oıyndy «Qazsport» telearnasy tikeleı efırde kórsetedi. 

Aıta keteıik, bastapqyda bul týrnırge Qazaqstan, Namıbııa, Komor araldary jáne Kýveıt qatysady dep josparlanǵan. Alaıda Kýveıttiń Astanadaǵy aladop básekesine qatysýdan bas tartýyna baılanysty oıyndardy aınalmaly júıe boıynsha ótkizý týraly sheshim qabyldandy. 

Kelesi kezdesýin el quramasy 31 naýryzda Komor araldaryna qarsy ótkizedi. Al 28 naýryzda Namıbııa men Komor araldary jasyl alańǵa shyǵady.

FIFA Series alǵash ret 2024 jyly pılottyq formatta uıymdastyryldy. Sol tájirıbeden keıin joba tolyqqandy halyqaralyq týrnır retinde damytylyp, 2026 jyldan bastap keńeıtilgen formatta ótedi.

Basty jańalyq – endi bul týrnırge erler quramalarymen qatar áıelder ulttyq komandalary da qatysady.

Týrnırdiń negizgi maqsaty – ulttyq quramalardyń oıyn tájirıbesin arttyryp, ártúrli fýtbol mektepteriniń bir-birimen básekege túsýine múmkindik berý. FIFA Series aıasynda ár topqa túrli qurlyqtan tórt komandadan bólinedi. Árbir qurama eki match ótkizedi. Bul halyqaralyq kúntizbege artyq júkteme túsirmeı, sonymen birge sapaly oıyn tájirıbesin qamtamasyz etýge baǵyttalǵan.

Bıylǵy týrnır matchtary birneshe elde ótedi. Olardyń qatarynda Qazaqstan da bar. Sonymen birge Aýstralııa, Ázerbaıjan, Indonezııa, Qazaqstan, Jańa Zelandııa, Pýerto-Rıko, Rýanda jáne Ózbekstan qabyldaýshy elder retinde tańdaldy.

Buǵan deıin Fýtboldan Qazaqstan quramasynyń bas bapkeri Talǵat Baısýfınov naýryz aıynda ótetin «FIFA Series-2026» týrnırine qatysatyn oıynshylardyń naqty tizimin jarııalaǵanyn habarlaǵan edik.