Búgin áskerı topograftardyń kásibı merekesi
ASTANA. KAZINFORM — Geoaqparattyq qamtamasyz etý departamenti dep atalatyn Topografııalyq qyzmet Qorǵanys mınıstrliginiń quramynda 1992 jyly 30 qańtarda quryldy.
Tehnologııanyń ilgerileýi topogeodezııalyq, navıgatsııalyq jáne gıdrometeorologııalyq qamtamasyz etý ádisterin aıtarlyqtaı ózgertti. Dese de topograftardyń qyzmetine qoıylatyn negizgi talap – dáldik, senimdilik jáne ýaqtyly oryndaý ózgergen joq.
Áskerler men qarý-jaraqty tıimdi qoldaný úshin áskerı topograftar armııa bólimshelerin aımaq týraly naqty jáne senimdi aqparatpen qamtamasyz etedi. Sonymen qatar, olar topografııalyq, teńiz, arnaıy kartalar men qala josparlaryn analogtyq jáne tsıfrlyq formatta daıyndap, basyp shyǵarady.
Bul mindetter, atap aıtqanda áskerler men qarý-jaraqty basqarý jańa tehnologııalar arqyly júzege asyrylady. Ushqyshsyz basqarylatyn apparattarmen jyljymaly navıgatsııalyq keshender olardy sapaly ári qysqa merzimde sheshýge múmkindik berip otyr. Alynǵan aqparat áskerlerdi basqarýdyń avtomattandyrylǵan júıelerimen biriktiriledi.
Qazirgi tańda Ulttyq qorǵanys ýnıversıtetimen birlesip, áskerlerdiń jaýyngerlik qyzmetine vırtýaldy shyndyq tehnologııasyn engizý jobasy pysyqtalyp jatyr. Olardyń kómegimen jergilikti jer týraly aqparat qabyldaýǵa qolaıly formatta beriledi.
Máselen, ótken jyly «Birlestik» jáne «Myzǵymas baýyrlastyq» oqý-jattyǵýlarynda jer bederiniń modelin vızýalızatsııalaý jáne ondaǵy áskerlerdiń urys qımyldarynyń dınamıkasyn kórsetý úshin qum men basqa materıaldardan jasalǵan dástúrli maketterdi almastyratyn tsıfrlyq tehnologııalar sátti qoldanyldy.
Osylaısha, topografııalyq qyzmet biryńǵaı basqarý júıesimen «tsıfrlyq urys alańyn» qurý tehnologııasyna kóshý qadamdaryn dáıekti túrde júzege asyrýda.
Buǵan deıin habarlanǵandaı, Qazaqstannyń áskerı topograftary zamanaýı tehnologııamen qamtamasyz etilgen.