Búgin – Jetisý oblysynyń qurylǵanyna 1 jyl

TALDYQORǴAN. QazAqparat – 8 maýsymda Prezıdent Qasym-Jomart Toqaevtyń Jetisý oblysyn qurý týraly qaýlysy kúshine engen bolatyn. Aıtýly kúnge oraı Taldyqorǵan qalasynda páter kiltteri berilip, 1 jasqa tolǵan balalardyń tusaýy kesildi, dep habarlaıdy QazAqparat tilshisi.

Aımaqtyń bir jyldyǵynda taldyqorǵandyq 72 otbasy baspanaly boldy. Jańa shańyraqtyń kilti negizinen múmkindigi shekteýli jandarǵa, tolyq emes otbasy ókilderi men ata-ana qamqorlyǵynan aıyrylǵan jastarǵa berildi. Óńir basshysy Beıbit Isabaev jyl aıaǵyna deıin aı saıyn kópqabatty turǵyn úıler qoldanysqa berilip, baspana kezeginde turǵandardyń máselesin sheshý jospary turǵanyn atap ótti. Qazir oblys ortalyǵynda 15 myńǵa jýyq adam úı kezeginde tur. Bıyl 2 myń adam qonys toıyn toılaıtyn bolady.

Sondaı-aq merekelik is-shara barysynda byltyr 8 maýsymda dúnıege kelgen 22 náresteniń tusaýy kesildi. Jetisý oblysy qurylǵan kúni aımaqta 47 bóbek dúnıege kelgen.

«Biz balalarymyzdyń osyndaı aıtýly kúni dúnıege kelgenine óte qýanyshtymyz. Endi jyl saıyn balapandarymyzdyń týǵan kúnin Jetisý oblysynyń qurylýymen qatar atap ótip otyratyn bolamyz. Oblysymyz qalaı damysa, balalarymyz da ósip-ónip, úlken azamat bolyp, elge qyzmet etedi degen senimdemiz», - deıdi egiz qyzdyń anasy Naǵıma Qojanbaeva.