«Jaıyq» voleıbol klýby Azııa chempıondar lıgasynda baq synaıdy
ORAL. KAZINFORM — «Jaıyq» voleıbol klýby Indonezııada ótetin Azııa chempıondar lıgasynda óner kórsetedi.
Ótken jyly el chempıony atanyp, bıyl qola júldege ıe bolǵan batysqazaqstandyq klýb Azııa qurlyǵyndaǵy eń bedeldi jarystardyń birine tyńǵylyqty daıyndalý maqsatynda Túrkııanyń Antalııa qalasyna oqý-jattyǵý jıynyna attandy.
BQO dene shynyqtyrý jáne sport basqarmasynan túsken málimetke qaraǵanda, jattyǵý jıyny mamyrdyń 9-na deıin jalǵasady. Odan soń komanda Indonezııaǵa attanady. Túrkııada oraldyq komanda sapyna sheteldik joǵary deńgeıli oıynshy qosylady.
Ótken jyly Vıktor Kozıktiń shákirtteri Ortalyq Azııa chempıondar lıgasynda top jarǵany belgili.
Bıylǵy Azııa chempıondar lıgasy jańa formatta ótpek. Atap aıtqanda, komandalar jarysty birden shırek fınaldan bastaıdy. Jeńgen komanda jartylaı fınalǵa joldama alady. «Jaıyqtyń» alǵashqy qarsylasy – Indonezııa eliniń myqty klýbtarynyń biri.
Qurlyqtyq dodaǵa Japonııa, Taıland, Iran, Katar, Ońtústik Koreıa jáne Indonezııa memleketteriniń jetekshi klýbtary qatysady. Bul – básekelestiktiń joǵary bolatynynyń dáleli.
Jarys 13 mamyr kúni bastalady. Týrnır qorytyndysynda fınalǵa shyqqan eki komanda 2026 jylǵy klýbtar arasyndaǵy álem chempıonatyna joldama alady.
Ótken jyly Qazaqstan atynan alǵash ret qatysqan «Aqtóbe» voleıbol klýby toptyq kezeńnen súrinbeı ótkenmen, shırek fınalda qarsylasyna jol bergen edi.
Eske sala keteıik, budan buryn «Jaıyq» voleıbol klýbynyń Qazaqstan chempıonatynyń qola júldesin jeńip alǵanyn jazǵan bolatynbyz.
Sondaı-aq «Jetisý» voleıbol klýby Azııa chempıondar lıgasynyń qola júldegeri atandy.
