Búgin - qyz-kelinshekter oramal taǵatyn kún

ASTANA. QazAqparat - 1 aqpan kúni álemniń barsha qyz-kelinshekteri musylman qyzdarǵa qoldaý retinde bir kún bastaryna oramal taǵady. Osylaısha, túrli dindi ustanatyn álem áıelderi oramaldy adamnyń ajyramas quqyǵy retinde syılaýdy talap etip, ıslamofobııa men kemsitýshilikke qarsy narazylyqtaryn bildiredi.

Eń alǵash oramal kúni týraly bastamany 2011 jyly amerıkalyq Nazma Khan kóterdi. Ol 11-jasynda ata-anasymen Bangladeshten Amerıkaǵa kóship kelgen. Oramalyna baılanysty mektepte de, ýnıversıtette de talaı quqaıdy kórgen qyz ózi sekildi ápke-sińlilerine rýhanı kómek kórsetý maqsatynda áleýmettik jeliler arqyly barsha álem qyz-kelinshekterine bir kún oramalmen júrý týraly úndeý tastady.

Qyzyǵy sol, alǵashqy jyly-aq Nazmanyń bastamasyn 67 eldiń názik jandylary qoldaı ketti. Al 2015 jyly álemniń 116 elinen 10 mıllıonǵa jýyq áıel sharaǵa qoldaý bildirdi.