Búgin - QR ǵylym salasy qyzmetkerleriniń kúni
ASTANA. 12 sáýir. QazAqparat - Búgin QR ǵylym salasy qyzmetkerleriniń kúni. Mereke 2011 jyly Prezıdent Nursultan Nazarbaevtyń Jarlyǵymen bekitildi.
Sala qyzmetkerlerin tól merekelerimen QR Bilim jáne ǵylym mınıstrligi quttyqtady.
"Qurmetti ǵylym salasynyń qyzmetkerleri! Barsha ǵalymdardy, ǵylymı ınstıtýt mamandaryn sonymen qatar, ǵylym salasyndaǵy qyzmetkerlerdi kásibı merekelerimen quttyqtaımyz!
Búginde elimiz órkendeýdiń jańa satysyna kóterildi. Adamı kapıtal - strategııalyq mańyzdy resýrstyń biri bolyp otyr. Elbasy N.Á. Nazarbaev óziniń halyqqa Joldaýynda otandyq ǵylym men bilimniń negizgi maqsatyn aıqyn belgiledi: «Básekege qabiletti, damyǵan memleket bolý úshin biz joǵarǵy bilimdi ult bolýymyz kerek».
Sońǵy jyldary respýblıkamyzdaǵy ǵylym salasynda aıtarlyqtaı ózgerister oryn aldy. «Ǵylym týraly» zań qabyldandy, ǵylymdy basqarýdyń jańa úlgisi men qarjylandyrýdyń jańa tetikteri jumys isteı bastady.
2010 jylmen salystyrǵanda, ǵylymdy qarjylandyrý 2,7 esege ósti. Osy ýaqyttyń ishinde ǵylymı jobalardy granttyq qarjylandyrýdyń 4 konkýrsy ótti. Álemdik aqparattyq resýrstar men ǵylymı basylymdarǵa qoljetimdilik qamtamasyz etildi, ǵylymı-tehnıkalyq saraptamanyń halyqaralyq júıesi engizildi, ǵylym men bilimniń, óndiristiń ıntegratsııasy qarqyndy damyp keledi.
Qazaqstannyń ǵylymı áleýeti qashanda joǵary ekenin, biz shyn máninde ǵylym salasynda birtutas mekteptiń negizin salǵan, óziniń ǵylymı arnasynda aıtýly jetistikterge qol jetkizgen ǵalymdarymyzben maqtanatynymyzdy basa aıtý kerek.
«Qazaqstan - 2050» Strategııasyn» júzege asyrý men Qazaqstan Prezıdenti N.Á. Nazarbaevtyń aldyńǵy qatarly otyz eldiń qataryna qosylý - elimizdiń ǵylymı-zertteý áleýetin jumyldyrý men zertteý jumystaryn halyqaralyq deńgeıge kóterý, sonymen qatar onyń tájirıbe júzinde júzege asýyn qamtamasyz etý bolyp tabylady.
Sizderge sarqylmas zertteýshilik izdenis, Qazaqstannyń qarqyndap damýyna úles qosatyn jańa ǵylymı jetistikter tileımiz!"
