Búgin Qazaqstan armııasy túngi dabyl boıynsha kóterildi

ASTANA. QazAqparat - Búgin túnde oqý dabylynyń belgisi boıynsha Qazaqstannyń Qarýly kúshteri jaýyngerlik ázirliktiń joǵary dárejesine keltirildi. Bıylǵa áskerler túngi ýaqytta alǵash ret kóterildi, dep habarlaıdy QR Qorǵanys mınıstrliginiń baspasóz qyzmeti.

Bul qazaqstandyq armııanyń jaýyngerlik ázirligin tekserýdiiń ereksheligi bolyp tabylady. Bul rette dıversııalyq qaýipsizdikke erekshe nazar aýdaryldy. Bólimsheler jedel tapsyrma aldy, oqý-jaýyngerlik tapsyrmalardy oryndady. Qarýly kúshter aýqymyndaǵy oqý dabyly - osy apta boıy elimizdiń Qarýly kúshterinde ótip jatqan jaýyngerlik ázirlik boıynsha sabaqtardyń sońǵy bóligi. Іs-sharalar qarapaıymnan kúrdelige qaǵıdaty boıynsha ótkizildi.

Eń aldymen bólimsheler men vzvodtar deńgeıinde, ári qaraı rotalar men batalondar, áskerı bólimder, óńirlik qolbasshylyqtar (ásker tekteri), sodan keıin ásker túrleri men jalpy QR QK deńgeıinde ótti.

Túrler men ásker tekterin, óńirlik qolbasshylyq áskerlerin basqarý organdarynda áleýmettik sıpattaǵy tótenshe jaǵdaılardy joıý kezinde shtabtardyń úılesýi boıynsha jekelegen jáne birlesken shtabtyq jattyqtyrýlar ótkizildi. Áskerı qyzmetshiler kásibı jaýyngerlik jáne dene daıarlyǵynyń negizgi normatıvteri boıynsha synaq tapsyryp, grafıkalyq jáne ózge de jaýyngerlik qujattardy ázirledi.

Áskerı janjaldar sıpatynyń kúrt ózgerýi, sondaı-aq, qarý-jaraq pen áskerı tehnıkanyń zamanaýı úlgileriniń engizilýi jaǵdaıynda áskerı qyzmetshilerge ózderiniń teorııalyq jáne praktıkalyq bilimderin jetildirý, qysqa merzimde jan-jaqty daıyndyqty júzege asyrýǵa, uıymdasqan túrde qarsylaspen urysqa túsýge jáne qoıylǵan tapsyrmany oryndaý úshin udaıy jaýyngerlik ázirlikte bolý mańyzdy.