Búgin elimizdiń barlyq onkodıspanserlerinde ashyq esik kúni ótti
«Ashyq esik kúninde mammolog mamandarynyń tegin keńesin alyp, mammografııalyq nusqaýlyq pen ÝDZ-dan ótýge bolady. Sonymen qatar, qaterli isikke tegin skrınıng jasaý týraly aqparat alý múmkindigi bar», - delingen Qazaqstannyń medıtsınalyq saqtandyrý qory taratqan habarlamada.
Medıtsınalyq saqtandyrý qorynyń málimetinshe, búginde keýde qaterli isigi Qazaqstandaǵy onkologııalyq aýrýlardyń ishinde alǵashqy orynda tur. Sondyqtan, elimizdegi 40 pen 70 jas aralyǵyndaǵy áıelder ózderi tirkelgen emhanada 2 jylda bir ret tegin mammografııalyq tekserýden ótip turýy tıis. Osy oraıda onkologııalyq aýrý túrlerimen kúresýge Qazaqstan jyl saıyn 36 mlrd teńge qarjy bóledi. Onyń 4 mıllıardy tegin onkoskrınıng jasaýǵa jumsalady.
Aıta ketsek, Elbasynyń 5 qazandaǵy Qazaqstan halqyna Joldaýynda densaýlyq salasyna qatysty birneshe bastamalar aıtylǵan bolatyn. Sonyń biri - 2019 jyly bastalatyn Astanadaǵy Ulttyq onkologııalyq ǵylymı ortalyqtyń qurylysy.
Odan bólek, Joldaýda medıtsınalyq-áleýmettik kómektiń qoljetimdiligi men densaýlyq saqtaý salasynda digital-tehnologııalardy damytý kerektigin qadap aıtqan bolatyn. Atalǵan tapsyrmany oryndaý maqsatynda QR Densaýlyq saqtaý mınıstrligi keler jyldan bastap barlyq densaýlyq saqtaý mekemelerindegi qaǵazbastylyqty joıyp, elektrondy formatqa kóshirýdi qolǵa alyp jatyr.
