Búgin Astanada aıtýly aqynnyń mereıtoılyq keshi ótedi

ASTANA. QazAqparat - Qyrkúıektiń 18 juldyzy kúni saǵat 17.00-de L.N.Gýmılev atyndaǵy Eýrazııa ulttyq ýnıversıtetiniń Tuńǵysh Prezıdent aýdıtorııasynda Qazaqstan Respýblıkasy Memlekettik syılyǵynyń laýreaty, «Juldyz» jýrnalynyń bas redaktory, kórnekti aqyn Ulyqbek Esdáýlettiń 60 jasqa tolýyna oraı «Altaıdyń altyn tamyry» atty ádebı-mýzykalyq kesh ótedi.

Keshke memleket jáne qoǵam qaıratkerleri, aqyn-jazýshylar men óner ıeleri qatysady. Sharany Qazaqstan Respýblıkasynyń Eńbek sińirgen ártisi, Eýrazııa ulttyq ýnıversıteti janyndaǵy «Káýsar» mádenı-tanymdyq birlestiginiń jetekshisi Kenjeǵalı Myrjyqbaev júrgizedi.

Ulyqbek Esdáýlet - qazaq poezııasyndaǵy dara talant, «Qanat qaqty», «Kózderińe ǵashyqpyn», «Juldyz jaryǵy», «Altaıdyń altyn tamyry», «Ulystyń uly kúni», «Aq kerýen», «Jaratylys», «Júrektegi jarylystar», «Zaman-aı», «Kıiz kitap», «Ǵumyr jas», «Ábilhaıat» kitaptarynyń avtory.

Aqynnyń mereıtoıyna arnalǵan shyǵarmashylyq kesh mamyr aıynda Almatyda «Jylqy jylǵy júzdesý» degen atpen ótkizilgen bolatyn. Sol úrdis óz jalǵasyn taýyp keledi. 25-28 qyrkúıekte Túrkııanyń Elazyq qalasynda ótetin dástúrli 22-shi «Hazar jyr aqshamdary» festıvaliniń bıylǵy baǵdarlamasy barysynda U.Esdáýletovtiń mereıtoıy men túrikshe kitabynyń tusaýkeser rásimi ótkiziledi, dep habarlaıdy Ádebıet portaly.