Brazılııanyń burynǵy prezıdenti qamaýdan ýaqytsha bosatyldy

ASTANA. KAZINFORM — Memlekettik tóńkeriske áreket jasaǵany úshin uzaq merzimdi bas bostandyǵynan aıyrý jazasyna kesilgen Brazılııanyń burynǵy prezıdenti Jaır Bolsonarý qaıtadan aýrýhanaǵa tústi, dep habarlaıdy BILD.

Brazılııalyq BAQ habarlaýynsha, memlekettiń burynǵy basshysyn birneshe aı boıy sozylmaly yqylyq mazalaǵan. Dárigerler em júrgizý týraly sheshim qabyldady. Aldymen ýltradybys arqyly dıafragmalyq júıkeni anyqtap aldy, sodan keıin naýqasqa aýyrsynýdy basatyn dári salyndy. Medıtsınalyq top protsedýranyń sátti ótkenin habarlady.

Osyǵan deıin Bolsonarýǵa el astanasyndaǵy DF Star jeke klınıkasynda shap jaryǵyn alyp tastaý otasy jasalǵan edi. Onyń zaıybynyń aıtýynsha, otaý asqynýsyz ótken.

Burynǵy prezıdent birneshe jyldan beri densaýlyǵyna baılanysty problemalardan zardap shegip keledi. 2018 jylǵy saılaý naýqany kezinde oǵan shabýyl jasalyp, ish tusyna pyshaq jaraqaty salynǵan. Sodan beri oǵan birneshe ota jasaldy.

Emdeýin aıaqtaǵannan keıin Jaır Bolsonarý qaıtadan qamaýda ustaý ornyna aýystyrylady dep josparlanyp otyr.

Eske sala ketsek, qyrkúıekte Brazılııanyń Joǵarǵy sotyndaǵy sýdıalar alqasy Bolsonarýdy 2022 jylǵy saılaýda jeńilgennen keıin áskerı tóńkeris jasaýǵa áreket etti dep tanyǵannan soń kóp uzamaı úkim shyǵardy.

Brazılııanyń burynǵy prezıdenti bul sheshimge apellıatsııa berip, úıqamaqta bolǵan kezinde ustaldy. 

Osydan buryn Jaır Bolsonarýǵa teriniń qaterli isigi dıagnozy qoıylǵan.