«Bir aýyl — bir ónim» jobasy: 20 óńirde kórme ótti
ASTANA. KAZINFORM — «Bir aýyl — bir ónim» jobasynyń ónimderi elimizdegi saýda jelilerinde satylymda «Bir aýyl — bir ónim» jobasy jergilikti ónim óndirýshilerdi qoldaý baǵyty boıynsha iske asyrylady. Ol keńes berý, kórme uıymdastyrý, perspektıvalyq ónimderdi irikteý, brend ázirleý, oqytý men marketıng sekildi qarjysyz qoldaýdy kózdeıdi. Bul týraly Saýda jáne ıntegratsııa mınıstrligi málim etti.
2025 jyly joba sheńberinde 1058 keńes berilip, 20 óńirlik kórme ótkizilgen. Oǵan 821 óndirýshi qatysty. 20 óńirlik brend-komıtet otyrysy qorytyndysy boıynsha 200 ónim túri iriktelip, jobanyń 60 jeńimpazy anyqtaldy. 2025 jylǵy basty oqıǵanyń biri 21-23 naýryzda Astanada ótkizilgen «Naýryz bazary» halyqaralyq jármeńkesi. Oǵan 14 óńirden 2023-2024 jyldardaǵy jobaǵa 24 fınalısi qatysty.
— Óndirýshiler bal, sút ónimin, gastronomııalyq et, táttiler men sýsyn sııaqty shamamen 2 tonna ónim usyndy. Bul halyqtyń jergilikti ónimge degen zor qyzyǵýshylyǵyn kórsetedi. 2025 jylǵy naýryzda Japonııanyń halyqaralyq yntymaqtastyq agenttiginiń (JICA) qoldaýymen jergilikti ónim óndirýshilerdiń ónimi Tokıodaǵy FOODEX JAPAN 2025 halyqaralyq kórmesinde usynyldy. Kórmege Qyzylorda, Shyǵys Qazaqstan, Soltústik Qazaqstan oblystarynyń óndirýshileri qatysty. Kórmede Qyzylorda oblysynan kelgen jantaq baly «Japonııanyń úzdik baly» bedeldi baıqaýyna qatysýǵa shaqyrý alsa, Altaı shóp shaıy sheteldikterdiń kózaıymyna aınaldy, — delingen habarlamada.
Kórmege álemniń 75 elinen óndirýshi kelgen. Jahandyq arenada qazaqstandyq ónim joǵary deńgeı kórsetti. Jobanyń fınalısteri 2025 jylǵy qyrkúıekte Frantsııadaǵy Mondial du Fromage — 2025 baıqaýynda eshki jáne túıe sútinen jasalǵan irimshik pen sút ónimi, sondaı-aq ulttyq ónimder úshin altyn jáne qola medalǵa ıe boldy. Mańyzdy ınfraqurylymdyq qadam 2025 jylǵy 8 qazanda Almatyda Ortalyq Azııadaǵy tuńǵysh turaqty halyqaralyq saýda núktesi — NOMAD Bazaar-dyń ashylýy boldy.
Kók bazarda ornalasqan alań satý, logıstık, marketıng pen býhgalterlik esepti ortalyqtan súıemeldeı otyryp, Qazaqstan men aımaqtaǵy elderdiń joba ónimin satýdyń turaqty arnasyna aınaldy. Ulttyq jobasynyń qatysýshylary men jeńimpazdarynyń ónimi naryqty senimdi túrde jaýlap alýda. Bul ónimderdi eldegi barlyq turǵyn satyp ala alady.
— Qazaqstandyq qolóner ıeleri men túrli óńirdiń óndirýshileri jasaǵan taýarlar Qazaqstannyń basty saýda jelilerinde usynylǵan. Máselen, Marwin jelisinde Atyraý oblysy jeńimpazynyń qazaq óneriniń úzdik úlgisiniń biri dombyra, sondaı-aq Qyzylorda oblysynyń óndirýshisi jasaǵan túıe sútinen jasalǵan kosmetıkalyq ónim bar. Almatydan kelgen qatysýshynyń kádesyıy da osy jeliniń dúken sórelerinen tabylady, — dep habarlady vedomstvodan.
Soltústik Qazaqstan oblysynyń óndirýshileri Galmart jelisinde tabıǵı, eshki irimshigin usynsa, Astanalyq ónim — tabıǵı pastıla — «VkýsMarket» jelisinde satylady. Jyldyń sońyn 2025 jylǵy 12-13 qarashada Astanada 18 óńirden 48 fınalısttiń qatysýymen ótkizilgen respýblıkalyq jobanyń kórmesi japty.
Kórmedegi jıyntyq túsim — 8 226 168 teńge.