Bot-platforma arqyly júginip, quqyǵy qalpyna keltirildi

ASTANA. KAZINFORM - Búgingi tańda, qyzmet alýshylardyń memlekettik qyzmetterdi alý kezinde týyndaǵan problemalyq máseleleri boıynsha ýákiletti organmen baılanysyn jeńil ornatý úshin «EgovKzBot2.0» Telegram bot-platformasy arqyly júginýi jetkilikti.

QR Memlekettik qyzmet isteri agenttiginiń Atyraý oblysy boıynsha departamenti baspasóz qyzmetiniń habarlaýynsha, atalǵan servıs azamattardyń memlekettik kórsetiletin qyzmetke qatysty shaǵym berýge nemese bıýrokratııany tómendetý, bıznes-protsesterdi ońaılatý jóninde usynystaryn jedel jasaýyna múmkindik beredi.

Osyǵan sáıkes, QR Memlekettik qyzmet isteri agenttiginiń Atyraý oblysy boıynsha departamentimen (budan ári – Departament) atalǵan bot-platforma arqyly kelip túsken shaǵymdary qaralyp, qyzmet alýshylarǵa tıisti jaýaptar usynylyp, quqyqtary buzylǵan jaǵdaıda jedel qalpyna keltirý jumystary júrgizilýde.

Máselen, memlekettik qyzmet alý kezinde týyndaǵan problemasy boıynsha júgingen qyzmet alýshy 2007 jyldan bastap jer ýchaskesin alý úshin kezekte turǵanyn, qazirgi ýaqytta jer ýchaskesin almaǵandyǵyna qaramastan «egov.kz» veb-saıtynda jer ýchaskesi berilgendigi qate kórsetilip turǵandyǵyn jetkizdi.

Bul másele departament tarapynan jiti zerdelenip, aqparattyq júıeni ázirleýshilerge dáleldi málimetter joldanyp, júrgizilgen jańartý nátıjesinde qyzmet alýshynyń jer ýchaskesine aqparattyq júıedegi kezegi qalpyna keltirildi.

Sondaı-aq, kezekti qyzmet alýshy Halyqqa qyzmet kórsetý ortalyǵyna túsirgen ótinishi boıynsha tolyqqandy túsindirme berilmegendigin kórsetip shaǵymdandy.

Bul tusta, departamenttiń yqpal etý nátıjesimen Atyraý qalasyndaǵy №2 HQKO bólim basshysy qyzmet alýshymen telefon arqyly habarlasyp, shaǵymǵa arqaý bolǵan másele boıynsha tıisti aqparat tolyqqandy túrde berildi.

Osyǵan uqsas, Departament qyzmet alýshylardyń «EgovKzBot2.0» Telegram bot-platformasy arqyly júgingen máselelerine tıisti quqyqtyq-túsindirme aqparattaryn turaqty túrde usynýda.