Bosaǵan saralanǵan bilim granttary qalaı bólindi

ASTANA. KAZINFORM - Ǵylym jáne joǵary bilim mınıstrligi bosaǵan saralanǵan bilim granttary qalaı bólingenin túsindirdi.

Bıyl mınıstrlik qosymsha bilim granttaryn bólgeni belgili. Sondyqtan keı saralanǵan grant ıeleri tolyqqandy grantqa aýysty.

«Al bosaǵan saralanǵan granttar tizimde kelesi turǵan úmitkerlerge taǵaıyndaldy», - dep atap ótti vedomstvodan.

Esterińizde sala ketsek, bıyl alǵash ret ilki joba retinde elimizdegi joǵary oqý oryndarynda saralanǵan grant modeli engizilgen bolatyn. Grant sany - 300. Bul grantty jeńip alǵan stýdentter oqý aqysynyń teń jartysyn ózi tólese, qalǵanyn memleket ótep beredi. Biraq, mundaı grant barlyq mamandyqqa birdeı berilmeıdi. Ázirshe, «Pedagogıkalyq ǵylymdar» men «Áleýmettik ǵylymdar, jýrnalıstıka jáne aqparat» mamandyqtaryna granttar teńdeı bólingen. Saralanǵan grant ıegerleri shákirtaqy alady.

Aıta keteıik, grant taǵaıyndaý konkýrsyna 104 myńnan astam talapker qujat tapsyrdy. Bul - ótken jylmen salystyrǵanda 10 myńǵa artyq.

Jalpy, konkýrs nátıjesinde 79 myńǵa jýyq bilim granty úlestirildi. Memlekettik granttar respýblıkalyq komıssııa otyrysynyń qorytyndysy boıynsha taǵaıyndaldy. Bir grant ornyna eń úlken konkýrs «Stomatologııa» mamandyǵynda boldy. Bul mamandyq boıynsha 35 talapker bir orynǵa talasty. Munan keıingi oryndarda «Halyqaralyq qatynastar jáne dıplomatııa» (11 adam), «Dene shynyqtyrý muǵalimderin daıarlaý» (10 adam), «Aýdarma isi» jáne «Psıhologııa» (9 adam) boldy.

Grantqa úmitkerler arasynda baldar teńdigi jaǵdaıynda 22 myńnan astam talapker basym quqyqqa ıe boldy, olardyń ishinde «Altyn belgi» ıegerleri, halyqaralyq jáne respýblıkalyq olımpıadalardyń jeńimpazdary, oqý úzdikteri bar. Sondaı-aq, grant úılestirý barysynda áleýmettik osal sanattaǵy balalardyń kvotalary eskerildi.