«Bolashaq» baǵdarlamasyna qujat qabyldaý bastaldy

ASTANA. KAZINFORM — «Bolashaq» jáne «Ǵylymı taǵylymdamalar» baǵdarlamasy boıynsha qujat qabyldanady, dep habarlaıdy «Halyqaralyq baǵdarlamalar ortalyǵy» AQ baspasóz qyzmeti.

«Bolashaq» baǵdarlamasyna — 16 naýryzdan 16 qazanǵa deıin (egov.kz portaly arqyly) ótinim berýge bolady. Al «ǵylymı taǵylymdamalar» baǵdarlamasy — 16 naýryzdan 30 qazanǵa deıin (egov.kz portaly arqyly jáne HBO keńsesinde, Astana) jalǵasady.

2026 jyldan bastap «Bolashaq» baǵdarlamasyna birqatar jańalyq engizildi. Atap aıtqanda, jalpy bilim beretin pánder boıynsha halyqaralyq olımpıadalardyń jáne ǵylymı jobalardyń halyqaralyq konkýrstarynyń jeńimpazdary men júldegerleri (I–III oryndar) úshin «bakalavrıat» sanaty engizildi.

Sonymen qatar, atom energetıkasy salasynda mamandar daıarlaýǵa arnalǵan jeke baǵyt iske qosylyp, «Jasandy ıntellekt» baǵyty boıynsha kásibı taǵylymdamalarǵa bólek sanat bólindi.

2026 jyly «Bolashaq» baǵdarlamasy boıynsha oqý úshin 635 stıpendııa bólindi. Onyń ishinde bakalavrıat baǵdarlamasy boıynsha — 20 stıpendııa, magıstratýra baǵdarlamasy boıynsha — 400 stıpendııa, doktorantýra boıynsha — 50 stıpendııa, taǵylymdamalar boıynsha — 165 stıpendııa.

«Ǵylymı taǵylymdamalar» baǵdarlamasy boıynsha 2026 jyly 250 stıpendııa bólindi.

Memleket akademııalyq oqýǵa, taǵylymdamadan ótýge, ushýǵa, medıtsınalyq saqtandyrýǵa, vızalyq alymdarǵa, oqýlyq materıaldaryn satyp alýǵa jumsalatyn shyǵyndardy jabady, sondaı-aq aı saıyn stıpendııa tóleıdi.

Budan buryn «Bolashaq» baǵdarlamasynyń shákirtaqysy men tólemderiniń mólsheri qaıta qaralýy múmkin ekeni aıtyldy.