Boks: Parıj Olımpıadasynan keıin qandaı qorytyndy jasaldy

ASTANA. KAZINFORM – QR Týrızm jáne sport vıtse-mınıstri Serik Jarasbaev Los-Andjelestegi aldaǵy Olımpıada oıyndaryna bokstan elimizdiń quramasy qalaı daıyndalyp jatqany týraly túsinik berdi.

— Qazaqstan boksynyń jaǵdaıy elimizde jıi talqylanatyny belgili. Degenmen, bizdiń sportshylar álemdik arenada óziniń básekege qabiletti ekenin dáleldep keledi. Buǵan dálel retinde jaqynda ótken álem chempıonattarynda jaqsy oryndardan kóringenin aıtýǵa bolady. Rasynda da, Parıjde ótken sońǵy Olımpıada oıyndarynda sátti óner kórsetken joq. Sol kezde birqatar túsinikteme berildi. Osy Olımpıada oıyndarynyń qorytyndysy boıynsha biz birqatar kadrlyq ózgerister jasadyq. Atap aıtqanda, federatsııany jas ári bolashaǵy zor basshy basqarýǵa kiristi. Qazir ol bul salada ózin jaqsy kórsetip otyr. Meniń oıymsha, barlyq osy laýazymdar men bas bapkerdiń jańarýyn jáne buǵan deıingi qatelikterdi eskere otyryp, biz Los-Andjelestegi oıyndarǵa jańa formatta daıyndalyp jatyrmyz. Bul jarysqa úsh jyl ǵana ýaqyt qaldy, — dedi S. Jarasbaev Senatta tilshiler suraǵyna jaýap bere otyryp.

Onyń aıtýynsha, bokstan elimizdiń quramasy tolyqtaı jasaqtalǵan.

Budan buryn habarlanǵandaı, Grekııanyń Kosta-Navarıno qalasynda ótken Halyqaralyq Olımpıadalyq komıtetiniń (HOK) 144-shi sessııasynda 2028 jyly Los-Andjeleste ótetin Olımpıada oıyndarynyń baǵdarlamasyna boksty qosý týraly sheshim qabyldandy.