Bilimdi jastardyń bári shetelge ketse, Sátbaevtar qaıdan shyǵady

ASTANA. KAZINFORM — Jastarǵa áleýmettik jaǵdaı jasalýy kerek. Kazinform tilshisine suhbat bergen ardager munaıshy dál osylaı dep pikir bildirdi.

- Jas kezimde qyzmetkerlerge jaqsy qoldaý kórsetiletin. Bizge úı, jeńil avtokólikter beriletin. Ol kezde kólik alý óte qıyn edi. Qazir kólikpen eshkimdi tańǵaldyra almaısyz. Qazir de áleýmettik jaǵdaıdy jasap jatyr. Saýyqtyrý oryndaryna joldama berip turady. Biraq jastardy sol jumys ornynda ustap qalý úshin úı máselesin sheshý kerek. Buǵan deıin ıpotekalyq baǵdarlamalar júrdi. Birtalaı qyzmetkerlerimiz az paıyzben úı aldy. Keıin baǵdarlama toqtap qaldy. Osyndaı jumystardy ary qaraı damytsaq deımin, - deıdi Marat Baldanbaev.

Bilikti mamannyń aıtýynsha, jastardyń jalaqyǵa kóńili tolmaıdy. Sondyqtan kóbi jumys aýystyryp, keıbiri shetel asyp ketip jatqan kórinedi.

- Qazir páter jaldap turý óte qıyn. Jastardyń jıi kezdesetin máselesi de osy – úı ǵoı. Qazir úıdiń baǵasy aspandap ketti. Osy máseleni alǵa tartyp, talaı bilimdi jastarymyz basqa salaǵa, tipti shetelge ketip qalyp jatyr. Mundaı bilikti mamandardy joǵalta beretin bolsaq, Qanysh Sátbaevtar qaıdan shyǵady? Sol jastardyń ishinen taǵy bir Qanysh Sátbaevtar shyǵady, emes pe?! Biz shetelge ketip jatqan jastardy ózimizde ustap qalýymyz kerek. Ol úshin áleýmettik jaǵdaı jasaýymyz qajet, - deıdi ardager munaıshy.

Dúnıejúzindegi munaı qorynyń 2 paıyzy Qazaqstanda. Ol bolashaq úshin de jetkilikti. Bul týraly Shymkent munaı óńdeý zaýytynda 37 jyldan beri jumys isteıtin ardager munaıshy Kazinform tilshisine bergen suhbatynda aıtty.