BQO-da stýdentter kýrstastarynan aqsha bopsalaǵan: is sotqa joldandy
ASTANA. KAZINFORM — BQO prokýratýrasynyń qoldaýymen 2023 jyly bilim berý uıymdarynda «Komek Stop Bulling» platformasy engizildi, ol qazirgi ýaqytta respýblıkanyń 10 oblysynda sátti jumys isteıdi.
Batys Qazaqstan oblysy prokýratýrasynyń málimetinshe bul platforma balalarǵa (sonymen qatar olardyń ata-analaryna) ózderine qarsy barlyq zańsyz áreket týraly erkin habarlaýǵa múmkindik berdi.
— 2024 jyly júıege belgisiz bireýler aımaqtaǵy kolledj stýdentterinen qorqytyp alý arqyly aqsha bopsalaǵany týraly anonımdi habarlama kelip túsken. Aqsha bopsalaýǵa qatysy bar bir top jastar anyqtaldy. Qazirgi ýaqytta qylmystyq is Qylmystyq kodeksiniń 194-babynyń 2-bóligi boıynsha sotqa joldandy, — delingen habarlamada.
2024 jyly qosymsha jańa batyrmamen (#bizbirge) tolyqtyrylǵan, ol arqyly balalar kez kelgen ýaqytta psıhologpen tikeleı baılanysa alady (shaqyrý nómiri 1301).
Qazirdiń ózinde 20-dan astam adamǵa kómek kórsetildi (oqý problemalary, ómirdegi maqsattyń joqtyǵy, qurdastarymen qarym-qatynas jáne t. b. máseleler boıynsha).
— Qarasha aıynda áıel balalaryn tastap, qaryzyna baılanysty óz-ózine qol jumsaǵysy keletini týraly júıege habarlasqan. Telefon arqyly oǵan der kezinde psıhologııalyq kómek kórsetý nátıjesinde ol raıynan qaıtty, — delingen habarlamada.
Oblystyq prokýratýra zańnyń buzylǵany týraly habarlaý jáne kez kelgen ýaqytta kómek alý úshin atalǵan júıege habarlasýǵa bolatynyn eske salady.
Aıta ketelik Kókshetaýda bopsalaýshylar toby ustalǵan edi.