BQO-da Shaǵan jáne Derkól ózenderinde sý deńgeıi kóterilip jatyr

ORAL. KAZINFORM — Batys Qazaqstan oblysynda kúnniń jylynýyna baılanysty ózenderde sý deńgeıiniń sońǵy táýlikte qanshalyqty ózgergeni belgili boldy.

«Qazgıdromet» RMK BQO fılıalynyń dırektory Tilegen Shapanov usynǵan málimetke qaraǵanda, Jaıyqtyń salalary Shaǵan men Derkól ózenderinde sý deńgeıiniń kóterilgeni baıqalady.

Atap aıtqanda, Shaǵan ózenindegi sý deńgeıi Báıterek aýdany Chývashın aýyly tusynda 520 (táýliktik ósim — 32 sm, qaýipti shegi — 1 300 sm), Mıchýrınde 263 santımetrge (+53, 1 100 sm) jetken.

Sol sekildi Derkólde Tasqalada 443 (+20, 530 sm), Báıterek aýdany Zelenyı eldi mekeninde 304 (+50, 450 sm), Beleste 406 santımetr (+91, 700 sm) boldy.

Sondaı-aq Báıterek aýdanynda Bykovka ózeni Qurmanǵazy aýylynda 668 santımetrge (+18, 850 sm) jetti.

Tasqala aýdanynda osyǵan deıin kóterilgen 1-Shejin jáne 2-Shejin ózenderiniń qarqyny báseńdeı bastady. Qazirgi sátte 1-Shejin gıdrobeketinde sý deńgeıi 451 (-7, 680 sm), 2-Shejinde 756 (-6, 820 sm) santımetrdi kórsetip tur.

Oblystyń bas ózeni — Jaıyqtaǵy sý deńgeıi keıbir gıdrobeketterde sál joǵarylaǵanymen, birqatarynda azdap tómendegen. Aıtalyq, Bórli aýdany Jarsýat aýylynda 295 (+9, 1 000 sm), Oral qalasynda 132 santımetr (-2, 850 sm) bolyp tur.

Orynbor oblysyndaǵy Irekli qoımasynan Jaıyqqa burynǵysha sekýndyna 139 tekshe metr sý jiberilip jatyr.

Eske sala keteıik, budan buryn BQO ózenderinde muzdyń qalyńdyǵy ótken jylǵydan joǵary bolyp otyrǵanyn jazǵan edik.

Sondaı-aq Batys Qazaqstanda qar kúrt erip, joldy buzyp ketti.