BQO-da qazaq kınosynyń onkúndigi bastaldy
ORAL. KAZINFORM — Batys Qazaqstan oblysynda qazaq kınosynyń onkúndigi bastaldy. Shara aıasynda BQO turǵyndaryna otandyq kınonyń jetistigi men qazaqstandyq rejısserlerdiń týyndylary usynylatyn bolady.
Mundaǵy árbir kınokartına memleket tarıhyndaǵy negizgi kezeńderdi baıandap, kórnekti qoǵam qaıratkerleriniń ómirin tanystyrmaq.
Mańyzdy sharanyń ashylýyna Batys Qazaqstan oblysynyń ákimi Narıman Tóreǵalıev, Ulttyq kınony qoldaý memlekettik ortalyǵy Basqarma Tóraǵasynyń orynbasary Ádilet Omarov pen belgili rejısser Talǵat Temenov, aımaqtaǵy mádenıet salasynyń ókilderi men zııaly qaýym qatysty.
Sharada Batys Qazaqstan oblysynyń ákimi Narıman Tóreǵalıev otandyq kınematografııany nasıhattaý jónindegi jumystyń mańyzyn atap ótti: «Memleket basshysy Qasym-Jomart Toqaev Ulttyq quryltaıda kınoındýstrııany damytýdyń mańyzdylyǵyna erekshe nazar aýdarǵan bolatyn. Bul baǵyt – jas urpaqty ulttyq rýhta tárbıeleý men qoǵamdyq sanany jańǵyrtýdyń mańyzdy tetigi. Óńirlerde memleket qarjylandyratyn fılmderdi ulttyq kınony keńinen nasıhattaýǵa kómektesedi».
Sonymen qatar Ulttyq kınony qoldaý memlekettik ortalyǵy Basqarma Tóraǵasynyń orynbasary Ádilet Omarov Kıno kúnderi aıasynda usynylatyn fılmderge toqtaldy.
«Búginde qazaqstandyq kıno shyǵarmashylyq órleý kezeńin bastan keship jatyr. Mádenıet jáne aqparat mınıstrliginiń, sondaı-aq mınıstr Aıda Ǵalymqyzy Balaevanyń júıeli qoldaýynyń arqasynda biz sapaly fılmder túsirýmen qatar, ulttyq mádenıetke qoljetimdilikti arttyrýdy jalǵastyrýdamyz. Tarıh betterin ashyp kórsetetin kartınalar urpaqtar arasyndaǵy sabaqtastyqty nyǵaıtýda, sondaı-aq mádenı murany saqtaýda mańyzdy ról atqarady. Al Oral qalasynda onkúndiktiń ashylýy osy joldaǵy mańyzdy qadam.
Uly Otan soǵysyndaǵy Jeńistiń 80 jyldyǵyna oraı qazaqtyń qaısar qyzdary Mánshúk Mámetova men Hıýaz Dospanovanyń týǵan jerinde biz aldymen «Qara qyz» kórkem fılmin usynýdy jón taptyq. Budan bólek, qorjynymyzda taǵy birneshe fılm bar. Osylaısha, biz Ortalyqtyń qoldaýymen túsirilgen barlyq jobanyń kórermenge jetýin qalaımyz. Bul baǵytta oblys ortalyǵy ǵana emes, aýdan, aýyldar boıynsha arnaıy kórsetilim kestesi jasaldy, ákimdiktiń qoldaýymen birlese jumys júrgizetin bolamyz», – dedi Ádilet Omarov.
Otandyq kıno onkúndiginiń birinshi kúni kórermenderge belgili rejısser Talǵat Temenovtyń «Qara qyz» fılmi usynyldy. «Qara qyz» – qaharmandyq týraly fılm. Munda soǵys jyldarynyń shyndyǵymen qatar qan maıdan ortasynda jankeshti erlik kórsetken batyrlarymyz ben tylda júrip qyrýar eńbek etken azamattardyń adamı qundylyqtaryn baıandaıdy.
«Soǵystyń qasireti, adamzat janyna salǵan jarasy eshqashan jazylmaq emes. Sol sekildi osynaý beıbit ómirimiz úshin janyn berip, maıdan dalasynda qyrshynnan qıylǵan bozdaqtardyń eren eńbegin de máńgilik jadymyzda saqtaý – paryzymyz. Al mundaı fılmderdi jer-jerde usyný oń bastama, ásirese jas urpaq muny kórse, ózgeshe oı túıse deımiz», – dedi fılmniń rejısseri.
Buǵan deıin Qazaq kınosynyń onkúndigi Qaraǵandy oblysynda bastalyp, Jambyl, SQO-da jalǵasyn tapty. Aldaǵy ýaqytta bul úrdis jalǵasyp, elimizdiń ózge qalalary men aýyldyq okrýgterinde de uıymdastyrylmaq. Shara aıasynda ártúrli janrdaǵy fılmder usynylady. Jekeleı jiktesek, «Jambyl. Jańa dáýir», «Dos-Muqasan» fılmderi arqyly tulǵalarymyzdyń júrip ótken jolyna qanyǵýǵa bolady. Al «Baýyryna salý» dep atalatyn kınoda dástúrimiz dáriptelip, ultqa degen súıispenshilik sezimi eselenbek. Kishkentaı kórermenderge «Taıqazan» dep atalatyn anımatsııalyq týyndy kórsetiledi.
Aıta keteıik, buǵan deıin Ulttyq kınony qoldaý memlekettik ortalyǵynyń qoldaýymen 117 kartınanyń óndirisi aıaqtaldy. Onyń 72-si – kórkem, 37-si – derekti, 8-i – anımatsııalyq fılmder.
El óńirlerinde qazaq kınosynyń kúnderi bastalatynyn jazǵanbyz.