BQO-da kásipker aýyldastarynyń qaryzyn keshirdi

ORAL. QazAqparat – Bókeı ordasy aýdany Saıqyn aýylynda turatyn kásipker Ázbek Muhıtov ramazan aıynda aýyldastarynyń qaryzyn keshirdi, dep habarlaıdy QazAqparat tilshisi.

Óziniń aıtýynsha, aýyl turǵyny sheshenstandyq kásipkerlerdiń áleýmettik jelidegi chellendjin kórgennen keıin osyndaı saýapty qadamǵa barǵan eken.

Kásipkerdiń chellendjdi jalǵastyryp, aýyldastarynyń bereshegin keshirgeni áleýmettik jelide keńinen taralyp ketti.

«Barys» dep atalatyn azyq-túlik dúkenin 2011 jyly ashyp edim. Aýyl turǵyndarynyń taýardy jazdyryp alatyny bar. Olardyń úsh jyldan bergi qaryzy 63 685 teńgege jetipti. Іshinde joq-jitik jandar da, bereshegin qaıtaramyn dep júrgender de bar. Tizimge qaraǵan joqpyn, dápterdiń sol betterin jyrtyp tastap, bárin keshirýdi jón kórdim. Eń bastysy, bir-birimizge degen meıirimdilikten aınymaıyq, keshirimshil bolaıyq. Orazamyz qabyl bolsyn», dedi QazAqparat tilshisine Ázbek Muhıtov.