BQO-da ınternet-alaıaqtyq qylmysy 27,7 paıyzǵa ósip ketken
ORAL. KAZINFORM — Batys Qazaqstan oblysynda ınternet-alaıaqtyq qylmysy azaıar emes.BQO polıtsııa departamenti kıberqylmysqa qarsy is-qımyl basqarmasynyń bastyǵy, polıtsııa polkovnıgi Artýr Musaǵalıevtiń óńirlik kommýnıkatsııalar qyzmeti alańynda ótken brıfıngide málim etkenindeı, bıylǵy úsh aıda 129 ınternet-alaıaqtyq qylmysy tirkeldi, bul ótken jylǵy osy kezeńmen salystyrǵanda, 27,7 paıyzǵa nemese 28 derekke kóp.
Artýr Ǵaısaulynyń sózine qaraǵanda, kúni búginge deıin ınternet-alaıaqtyqtyń 55,5 paıyzy ashylǵan.
— 66 qylmystyq is óndirisi aıaqtalsa, sonyń 51-i aýyr sanatqa jatady. «Kıbernadzor» aqparattyq júıesine quqyqqa qaıshy keletin 1 557 ınternet resýrsy engizildi. Al «Antıfrod-ortalyq» elektrondy platformasynyń kómegimen kúmándi 1 024 esepshot ishinde qalǵan 11 mln 051,766 myń teńge qarajat buǵattaldy, — deıdi A.Musaǵalıev.
Onyń aıtýynsha, qazirgi ýaqytta alaıaqtyqtyń eń kóp taralǵan túri — ózin bank qyzmetkeri retinde tanystyrý. Osyndaı 68 derek belgili boldy. Sondaı-aq tanymal qosymshalardan taýarlar satyp alamyn dep aldaný (20), ınvestıtsııa salý (15) jáne basqa 22 derek tirkeldi.
— Polıtsııa qyzmetkerleri telearnalar men ınternet kózderi arqyly túsindirý jumystaryn turaqty júrgizip keledi. Oblys kóleminde «EGOV» saıty arqyly 17 myń adamnyń shottary buǵattaldy. Basqa da jumystar atqarylýda, — dedi basqarma bastyǵy.
Eske sala keteıik, budan buryn BQO-da qaı salanyń mamandary alaıaqqa jıi aldanatynyn jazǵan bolatynbyz.