BQO-da borandy kúni adasyp ketken eki adam tabylmaı jatyr

ORAL. KAZINFORM – Batys Qazaqstan oblysy Jánibek aýdanynda eki er adam joǵalyp ketti.

Jánibek aýdany ákimdiginen túsken málimetke qaraǵanda, oqıǵa 13 jeltoqsan kúni Kúıgenkól aýyldyq okrýginde boldy. 

Sol kúni tańmen 57 jáne 59 jastaǵy er adamdar Buqar qystaǵynan mal baǵýǵa ketkennen oralmaǵan. Uıaly telefondary bolmaǵan. 

- Eki adamnyń joǵalyp ketkeni týraly habar 13 jeltoqsan kúni saǵat 20.39-da túsken. Olardy izdestirýge 40 adam, 6 tehnıka jumyldyryldy. 15 jeltoqsan kúni tańmen saǵat 07.00-de izdestirý jumystary qaıta jalǵasty, - dep habarlady aýdan ákimdiginen.

BQO polıtsııa departamentiniń baspasóz qyzmetinen málim etkenindeı, Jánibek aýdanynda osyǵan uqsas taǵy bir oqıǵa boldy. 

13 jeltoqsan kúni 2005 jáne 1971 jylǵy eki adam Borsy aýyldyq okrýgindegi Tegisshil eldi mekeninen traktormen shyqqan. Olar Taý aýyldyq okrýgine qarasty Jiger qystaǵyna 200 bas iri qara maldy aıdap bara jatqan. Saǵat 14.30 shamasynda týystarymen baılanysqa shyǵyp, sosyn habarsyz ketken. 

Aýdandyq polıtsııa bólimi men tótenshe jaǵdaılar qyzmeti birlesip uıymdastyrǵan jedel is-sharalar nátıjesinde bul eki adam aman-esen tabyldy.

Eske sala keteıik, budan buryn BQO-da cý munarasy qulap, bir adamnyń joǵalyp ketkenin jazǵan edik.

Bókeı ordasy aýdanynda joǵalyp ketken 25 jastaǵy jigit áli tabylǵan joq.