BQO-da aýyl turǵyny úıinde esirtki zerthanasyn jasaǵan
ORAL. KAZINFORM – Batys Qazaqstan oblysy Terekti aýdany turǵynynyń úıinen jasyryn esirtki zerthanasy tabyldy.
BQO Polıtsııa departamentiniń baspasóz qyzmetinen málim etkendeı, 35 jastaǵy er adam úıiniń bólmesinde esirtki ósirý úshin zerthana jabdyqtaǵan.
Bólmeden 24 gramm keptirilgen qarasora jáne onyń ósip turǵan 5 túbi men eki jeldetkish qurylǵylary, sondaı-aq shegýge arnalǵan ártúrli quraldar tárkilendi.
- Sonymen qatar ósimdikterdiń ósýine jaǵdaı jasaý úshin paıdalanylǵan túbi men moıny kesilgen eki plastık bótelke tabyldy. Qazir atalǵan fakti boıynsha sotqa deıingi tergeý amaldary júrgizilip jatyr. Quramynda esirtki zattary bar, ósirýge tyıym salynǵan ósimdikterdi zańsyz egip-ósirý QR zańyna sáıkes qýdalanady, - dep habarlady vedomstvodan.
QR Qylmystyq kodeksiniń 300-babyna sáıkes mundaı qylmystar úshin eki myń aılyq eseptik kórsetkishke deıingi mólsherde aıyppul salý ne sol mólsherde túzeý jumystaryna nemese alty júz saǵatqa deıingi merzimge qoǵamdyq jumystarǵa tartý, eki jylǵa deıingi merzimge bas bostandyǵyn shekteý, sol merzimge bas bostandyǵynan aıyrý nemese úsh jyldan segiz jylǵa deıingi merzimge bas bostandyǵynan aıyrý jazasy qarastyrylǵan.
Eske sala keteıik, budan buryn Oral qalasynyń turǵyny saıajaı shatyrynda esirtki zerthanasyn uıymdastyrǵanyn jazǵan bolatynbyz.