BQO-da 7 myńnan astam túlek mektep bitiredi

ORAL. KAZINFORM – BQO-da 379 mektepte 124 myńnan astam oqýshy bilim alady. BQO bilim basqarmasynyń basshysy Eldos Safýllınniń óńirlik kommýnıkatsııalar qyzmeti alańynda ótken brıfıngide málim etkenindeı, Oral qalasyndaǵy 73 bilim ordasynda 66 myńnan astam shákirt bar.  

Eldos Nabıollaulynyń sózine qaraǵanda, 10 635 oqýshy 9-synypty aıaqtasa, 7 095 túlek mektep bitiredi. Sonyń ishinde 337-si (Oralda – 167) «Altyn belgiden», 419-y (232) «Úzdik attestattan» úmitker. 

Ulttyq biryńǵaı testileý 16 mamyr – 5 shilde aralyǵynda ótkizilýde. Oblys boıynsha 6 427 oqýshy UBT tapsyrýǵa ótinish bildirdi. 

– Memleket basshysynyń bilim salasyna qatysty tapsyrmalaryn jáne strategııalyq mańyzy bar qujattardy sapaly júzege asyrý baǵytynda aýqymdy jumystar atqarylýda. Osy oqý jylynda óńirde 4 768 jańa oqýshy orny quryldy. 193 robototehnıka, hımııa, bıologııa, fızıka jáne STEM-pánder boıynsha zamanaýı pándik kabınetter jabdyqtaldy. Sondaı-aq mektepterdi renovatsııalaý baǵdarlamasy bastaldy. Bıyl 6 mektepke jańǵyrtý jumystary júrgiziledi, - deıdi E.Safýllın. 

Onyń aıtýynsha, respýblıkalyq, halyqaralyq olımpıadalar men konkýrstarda 78 oqýshy 14 altyn, 24 kúmis, 43 qola medaldyń ıegeri atandy. 

Qazirgi ýaqytta oblystyń bilim berý uıymdarynda 21 myńnan pedagog eńbek etip jatsa, sonyń 70 paıyzǵa jýyǵy – jańa sıpattaǵy sanatqa ıe. 

– «Jaıly mektep» ulttyq jobasy aıasynda 9 mektep qurylysy qolǵa alynsa, sonyń úsheýi paıdalanýǵa berildi. Bilim berý ınfraqurylymyn damytý qorynyń qarajaty esebinen ótken jyly Oralda buryn apatty jaǵdaıda bolǵan № 31 mektep ǵımaraty jańadan salynyp, óz esigin aıqara ashsa, bıyl daryndy balalarǵa arnalǵan № 8 oblystyq mamandandyrylǵan mektep-lıtseıi qurylysyn tórtinshi toqsanda aıaqtaý kózdelip otyr. Sondaı-aq 2025-2027 jyldar aralyǵynda bilim basqarmasyna qarasty 86 mektepti kúrdeli jóndeýden ótkizý josparlanǵan. Buǵan qajetti qarjy kólemi – 60 mlrd 521,8 mln teńge. Oǵan qosa 5 mekteptiń qural-jabdyqtaryna 424,975 mln teńge bólindi. Kúni búgin konkýrstyq qujattama daıyndalýda, - dedi basqarma basshysy.

Eske sala keteıik, budan buryn soǵys jyldary Oraldaǵy mektep áskerı gospıtalǵa aınalǵanyn jazǵan bolatynbyz.