BQO-da 1,1 mln astam alıment tólemegen boryshker qamaýǵa alyndy

ORAL. KAZINFORM – Batys Qazaqstan oblysy Báıterek aýdanynyń soty alımentti qasaqana tólemeı júrgen boryshkerdi QR Ákimshilik quqyq buzýshylyqtar týraly kodeksiniń 669-babyna sáıkes (sot úkimin, sot sheshimin nemese ózge de sot aktisin jáne atqarýshylyq qujatty oryndamaý) kináli dep tanyp, 5 kúnge qamaýǵa alý týraly sheshim shyǵardy.

BQO prokýratýrasynyń baspasóz qyzmetinen málim etkenindeı, atalǵan boryshker 2021 jyldyń 29 sáýirinen bastap alıment tólemegen. Saldarynan qaryzy 1 mln 178,558 myń teńgege jetken.

Sot qaýlysy kúshine endi.

Jalpy, bıylǵy jyly oblys prokýratýrasynyń «Alıment boıynsha 10 qadam» jobasyn júzege asyrý jáne qabyldanǵan sharalardyń nátıjesinde óńirde alıment boryshy 2,4 mıllıardtan 1,4 mıllıard teńgege deıin azaıǵan.

«487 mıllıon teńge somasyndaǵy alımenttik qaryzdar óteldi. Ýákiletti organdar arasynda ózara tıimdi baılanysqa qol jetkizildi. 451 boryshker jumyspen qamtylyp, 598-i jumyspen qamtý organdarynda tirkeldi. Boryshkerlerdiń jyljymaıtyn múliktegi 5 úlesi (3 páter, jer telimi, turǵyn úıdegi úlesi) satylyp, 75,5 mıllıon teńge kólemindegi qaryz óndirip alýshylarǵa berildi. Boryshkerlerdi bás tigýshiler retinde tirkeýdiń 7 deregi anyqtaldy. Olar boıynsha alıment tóleý mindetinen jaltarǵany úshin QR Qylmystyq kodeksiniń 139-babyna (balalardy asyraý úshin qarajat tóleý boıynsha mindettemelerdi oryndamaý, múgedek ata-anany, múgedek jubaıyn asyraýǵa qarajat tóleýden jaltarý) sáıkes qylmystyq ister tirkeldi. Lombardtarda zergerlik buıymdardy 114,2 mıllıon teńgege satýmen aınalysqan 281 boryshker anyqtaldy. 165 boryshker ákimshilik jaýapkershilikke tartyldy. QR QK 139-babyna sáıkes 37 qasaqana boryshkerge qatysty 37 materıal tirkelip, sonyń ishinde 4 is boıynsha úkim shyǵaryldy», - dep habarlady vedomstvodan.

Eske sala keteıik, budan buryn BQO-da sýbsıdııaǵa berilgen 20 mln-nan astam teńgeniń maqsatsyz paıdalanylǵanyn jazǵan bolatynbyz.