Bıyl otandyq 70 kompanııa Alibaba platformasyna shyǵarylady

ASTANA. QazAqparat – Bıyl taǵy 70 otandyq kompanııa Alibaba platformasyna shyǵarylady. Bul týraly Saýda jáne ıntegratsııa vıtse-mınıstri Qaırat Tórebaev málim etti, dep habarlaıdy QazAqparat tilshisi.

«Mınıstrlik shaǵyn jáne orta bıznes úshin elektrondyq kommertsııa naryǵyna qoljetimdilikti jeńildetý úshin yntymaqtastyqqa jáne birlesken jumysqa daıyn. Biz olardyń mol tájirıbesin paıdalana otyryp, óz kúsh-jigerimizdi qazaqstandyq kásiporyndardy tsıfrlyq naryqqa shyǵarýǵa baǵyttaımyz. Eksporttaýshylardy qarjylyq emes qoldaý quraldarynyń biri - otandyq eksporttaýshylardy Alibaba.com elektrondyq platformasyna shyǵarý», - dedi ol Ortalyq kommýnıkatsııalar qyzmetindegi baspasóz máslıhatynda.

Jalpy, onyń dereginshe, 2020-2022 jyldary Alibaba platformasyna 220 kompanııa ornalastyryldy. Platformada ornalasqan kompanııalar úshin shaǵyn saıttar qurylady. Platformada jumys isteý jáne óz taýarlaryn jyljytý úshin oqytý vebınarlary ótkiziledi.

«Atalǵan kezeńde baǵdarlamaǵa qatysýshylardyń jıyntyq satý kólemi shamamen 225 mln AQSh dollaryn qurady. Bıyl biz altyn akkaýnttar usyn jumysyn jalǵastyramyz jáne taǵy 70 kompanııa atalǵan múmkindikke ıe bolady», - dedi Qaırat Tórebaev.