Bıshimbaevtyń isi Qyrǵyzstanda da qalyń jurtshylyqtyń nazaryn aýdardy
ASTANA. KAZINFORM – Qyrǵyzstanda jubaıy Saltanat Núkenovany óltirdi dep aıyptalǵan Qýandyq Bıshimbaevtyń qylmystyq isi boıynsha sot protsesin jurtshylyq jiti baqylap otyr. Bul oqıǵa Qazaqstanda da, Qyrǵyzstanda da ózekti bolyp otyrǵan turmystyq zorlyq-zombylyq máselesiniń jarqyn mysaly boldy. Bul týraly «Tandem» zań qoǵamdastyǵynyń dırektory, zańger, Qyrǵyz Respýblıkasynyń qoǵam qaıratkeri Táttibúbú Ergeshbaeva málimdedi.
Onyń aıtýynsha, qaıǵyly oqıǵa adamdardyń áleýmettik jaǵdaıy men materıaldyq ál-aýqatyna qaramastan zorlyq-zombylyq qurbany bola alatynyn kórsetti. Osy oraıda, qazir Qazaqstanda ótip jatqan Bıshimbaevtyń ashyq sot otyrysy Qazaqstan úshin ǵana emes, jalpy Ortalyq Azııa memleketteri men TMD úshin jarqyn úlgi bola alady.
«...Sot otyrysyn ashyq ótkizý – adam quqyqtaryn qorǵaý qyzmeti men sot tóreligi ınstıtýty úshin úlken jetistik. Qazir qoǵamda turmystyq zorlyq-zombylyq, áıelderdi azaptaý, áıelderge qatysty teń emes psıhıkalyq áreketter osy is arqyly aıtylyp, áleýmettik jelilerde Saltanat Núkenovany qorǵaýǵa úlken qoldaý kórsetip jatqanyn kórip otyrmyz. Bul áıelder yntymaqtastyǵy da damyp kele jatqanyn ańǵartady. Bul is Qyrǵyzstanǵa da erekshe áser etti dep esepteımin. Qyrǵyz Respýblıkasy Jogorký Keneshiniń depýtaty Sharapatqan Majıtova parlamentte turmystyq zorlyq-zombylyq máselesin kóterip, áıelderge qatysty zorlyq-zombylyq faktileri úshin jaýapkershilikti kúsheıtý úshin qylmystyq jáne ákimshilik kodeksterge ózgerister men tolyqtyrýlar engizýdi usyndy. Árıne, Qyrǵyzstanda azaptaý, densaýlyqqa zııan keltirý jáne adamnyń ómirinen aıyrý jaǵdaılary boıynsha jaýapkershilikke tartylatyn normalar bar. Biraq osy istiń arqasynda ákimshilik jaýapkershilikti kúsheıtý usynylyp otyr. Bul óte jaqsy, muny parlamentshiler de, qarapaıym halyq ta baqylap otyr. Saltanat Núkenovanyń qazasy árbir er- azamatqa turmystyq zorlyq-zombylyq jasaýǵa bolmaıtynyn oılaýǵa jáne ár áıeldiń rýhy joǵary bolýy tıis ekenin úıretkendeı boldy», - dedi Táttibúbú Ergeshbaeva.
Qoǵam qaıratkeri Bıshimbaev isiniń tóńiregindegi rezonans turmystyq zorlyq-zombylyqpen kúresýdiń mańyzdylyǵyna jáne zorlyq-zombylyq qurbandaryn tıimdi qorǵaýǵa, sondaı-aq olardyń der kezinde kómekke júginip, memleket pen qoǵamnan qoldaý alýyna jaǵdaı jasaý qajet dep sanaıdy.
«Men Ortalyq Azııa elderinde osyndaı pretsedentterdiń kóterilip jatqanyna qýanyshtymyn. ...Ortalyq Azııa elderinde sot tóreligin ornatýdaǵy kez kelgen oń dınamıka bizdiń elderdegi jaǵdaıǵa jaqsy áser etedi», - dep atap ótti zańger.
Aıta keteıik, turmystyq zorlyq-zombylyq taqyrybyn Qyrǵyzstan Respýblıkasy Jogorký Keneshiniń depýtaty Sharapatqan Majıtova parlament otyrysynyń birinde Qyrǵyzstandaǵy otbasylyq jáne seksýaldyq zorlyq-zombylyq faktileriniń kóbeıýin talqylaý kezinde kóterip, Bas prokýratýraǵa bul máseleni sheshýdi usynǵan bolatyn. Qyrǵyz Respýblıkasy Qazaqstanda bıyl sáýir aıynda qabyldanǵan «Saltanat» zańyna uqsas zań ázirleýge bastamashy boldy.
Ol Qazaqstanda áıeli Saltanat Núkenovany óltirdi dep aıyptalǵan burynǵy Ulttyq ekonomıka mınıstri Qýandyq Bıshimbaevtyń soty bir aıdan beri ashyq túrde ótip jatqanyn aıtty.
«Qazaqstanda kámeletke tolmaǵan balalar men áıelderge zorlyq-zombylyq kórsetkeni úshin jaýapkershilikke tartýǵa múmkindik beretin «Saltanat zańy» qabyldandy. Qyrǵyzstanda da osyndaı zań qabyldaý qajet. Óıtkeni zorlyq-zombylyq faktileri jyl saıyn artyp keledi», - dedi depýtat.
