Bishkekte qazaq kınosynyń kúnderi ótti
«Qazaqstandyq fılmderdi bizdiń elde kórsetýge árqashan daıynbyz. Sizderdiń fılmderińiz abyroıly halyqaralyq kınofestıvalderde jeńiske jetkende de shynaıy qýanamyz. Biz seriktestikke ashyqpyz jáne jaqyn arada Qazaqstanda qyrǵyz kınosynyń kúnderin ótkizýdi josparlap otyrmyz», - deıdi T. Ókeev atyndaǵy «Qyrǵyzfılm» ulttyq kınostýdııasynyń dırektory Aqjol Bekbolotov.
Qazaq kınosynyń kúnderi aıasynda Ulttyq kınony qoldaý memlekettik ortalyǵy halyqaralyq bóliminiń basshysy Ásel Yrys, rejısser Bolat Qalymbetov, prodıýser Dıana Ashımova, akter Tólepbergen Baısaqalov jáne taǵy basqa da delegatsııa músheleri Sh. Aıtmatov atyndaǵy Kıno úıinde boldy. Onda Ortalyq qyzmeti tanystyrylyp, sońynan dóńgelek ústel ótti. Al, keshke kórermen qazaq aqyny Muqaǵalı Maqataevtyń ómiriniń sońǵy jyldaryn kórsetetin «Muqaǵalı» fılmin tamashalady. Eske sala keteıik, bul fılm 25-shi «Qarańǵy túnder» Tallın kınofestıvali ekýmenıkalyq qazylar alqasynyń syılyǵyna ıe bolǵan.
«Sońǵy jyldary Ortalyq Azııalyq kıno jaıly aqparattyń azdyǵy seziledi. Biraq biz, qyrǵyz kınematografısteri ózbek, tájik, túrikmen jáne qazaq kınosyn tamashalap, áriptesterimizdiń jańalyqtaryn bilip, birlesken jobalardy oılastyrýymyz kerek. Bul kórermender úshin de mańyzdy», - deıdi qyrǵyz rejısseri Artyk Sýıýndýkov.
6 tamyzda qazaqstandyq delegatsııa qyrǵyz áriptesterimen birge Qyrǵyzstannyń Ulttyq tarıhı murajaıynda boldy. Sol kúni keshke Kıno kúnderiniń jabylý saltanaty ótip, Aıjan Qasymbektiń «Ot» fılmi kórsetildi. Kınosúıer qaýym kartınany jyly qabyldady jáne fılmde baıandalatyn oqıǵa barshaǵa ortaq ekenin atap ótti.
«Fılm shynaıy ómir, qarapaıym adamnyń qıyn taǵdyry týraly. Oqıǵa bizdiń halyqtarymyzǵa jaqyn. Eshteńege qaramastan ómir súrýdi, jaqsy kórýdi jalǵastyrý kerektigin baıandaıdy», - deıdi basty róldi somdaǵan Tólepbergen Baısaqalov.
Aıta ketsek, Bishkekte 5-6 tamyzda ótken qazaq kınosy kúnderin elimizdiń Ulttyq kınony qoldaý memlekettik ortalyǵy jáne Qyrǵyzstannyń Mádenıet, aqparat, sport jáne jastar saıasaty mınıstrligi kınematografııa departamenti uıymdastyrady.
