Bir jylda kúnbaǵys maıyn óndirý 62% artty

ASTANA. QazAqparat- Ótken jyly elimizde kúnbaǵys maıy óndirisi 62 paıyzǵa ósken. Ósim tazartylmaǵan suıyq maı óndirý esebinen artyp otyr, dep habarlaıdy QazAqparat Energyprom resýrsyna silteme jasap.

Byltyr jyl ishinde kúnbaǵys maıynyń baǵasy 17%-ǵa deıin qymbattaǵan. Qańtar-jeltoqsan aılary aralyǵynda 537,1 myń tonna kúnbaǵys maıy óndirildi.

2021 jylmen salystyrǵanda óndiris kólemi 62,2%-ǵa artyq.

Ósý qarqyny tazartylmaǵan kúnbaǵys maıyn shyǵarý esebinen (2,1 ese) 376,7 myń tonnaǵa deıin qamtamasyz etildi. Al tazartylǵan kúnbaǵys maıyn óndirý jyl ishinde 8,7%-ǵa, ıaǵnı 160,4 myń tonnany quraǵan.

Ótken jyly qańtar-qazanda jergilikti kompanııalar kúnbaǵys maıyna suranysty (ishki naryq jáne eksport) 81,5%-ǵa qamtamasyz etti.

Óndiris kólemi 389,9 myń tonnaǵa jetip, 2021 jylǵa qaraǵanda 47,1% artyq, al ımport 88,6 myń tonnany qurap, ósim 28%-ǵa artty.

Aıta ketsek, kúnbaǵys maıyn eksporttaý 2,5 ese, ıaǵnı187,5 myń tonnaǵa deıin ósken. Bul qolda bar resýrstyń 40%-ǵa jýyǵy. Atalǵan ónimdi ishki naryqta satý 12%-ǵa (291,1 myń tonna) deıin ósti.

2022 jyly jeltoqsan aıynyń qorytyndysy boıynsha kúnbaǵys maıy 0,4%-ǵa, al jyl boıy 17,1%-ǵa qymbattady.

Óńirler boıynsha maı baǵasynyń qymbattaýy SQO-da (10%), Qaraǵandy oblysynda 25,1%-ǵa jetti. Baǵanyń aıtarlyqtaı ósýi Almatyda (23,4%) jáne Ulytaý oblysynda (22,1%) baıqaldy.

Kúnbaǵys maıynyń ortasha bólshek baǵasy byltyr jeltoqsanda lıtri 910 teńge boldy.

Baǵanyń qymbattaýyn ásirese Qonaev (lıtri 1024 teńge) pen Jezqazǵan oblysynyń (1003 teńge) turǵyndary sezindi.

Al eń arzan kúnbaǵys maıy Semeı (lıtri 777 teńge) men Óskemenniń (lıtri 783 teńge) enshisinde boldy.