Bir aı ishinde turǵyn úı naryǵynyń barlyq segmentinde baǵa arzandady
«Bir jylda (2023 jylǵy sáýirden 2022 jylǵy sáýirge deıin) páterlerdi qaıta satý baǵasy – 3,8%, jańa turǵyn úılerdi satý 7,8% ósti. Abattandyrylǵan turǵyn úıdi jalǵa alý tólemi ótken jylǵy tıisti aımen salystyrǵanda 2023 jylǵy sáýirde 27,6% artty.
Óńirler bólinisinde jańa páterler baǵasy jyldyq mánde Aqtóbede – 25,4% jáne Aqtaýda – 24,8% qymbattady. Qoldanystaǵy páterler naryǵynda baǵa ósimi Semeı (31,6%), Qyzylorda (30,2%), Aqtaý (24,8%), Qostanaı (23,2%) jáne Aqtóbe (22,4%) qalalarynda baıqaldy, al turǵyn úıdi jalǵa alý naryǵynda baǵa Kókshetaý (45,5%), Petropavl (45,2%), Almaty (43,9%), Aqtaý (41,1%) jáne Qostanaı (40,8%) qalalarynda aıtarlyqtaı ósti», - dep jazdy bıýrodan.
Vedomstvo bir aıdyń ishinde (2023 jylǵy sáýirden 2023 jylǵy naýryzǵa deıin) turǵyn úı naryǵynda arzandaý barlyq segmentte baıqalǵanyn da jazdy. Atap aıtqanda, jańa turǵyn úıdi satý baǵasy - 0,6%, páterlerdi qaıta satý 1,5% tómenededi. Abattandyrylǵan turǵyn úıdi jalǵa alý tólemi aldyńǵy aımen salystyrǵanda sáýirde 0,5% arzandady.
«Bul rette, sáýirde turǵyn úıdi satyp alý-satý mámileleriniń sany ósti. 2023 jylǵy sáýirde satyp alý-satý boıynsha 31 445 mámile tirkelgen, onyń ishinde jeke úıler boıynsha 8 096 jáne páterler boıynsha 23 349 mámile jasaldy. 2023 jyldyń naýryzymen salystyrǵanda (24 273) turǵyn úıdi satyp alý-satý mámileleriniń sany 29,5%-ǵa ósti. Mámileler sany boıynsha Almaty (5 559 – 17,7%) jáne Astana (4 772 – 15,2%) qalalary kósh basynda. Mámileler sany Ulytaý oblysynda eń az – 342 birlik (1,1%).
2023 jyldyń naýryz aıymen salystyrǵanda sáýirde eń kóp ósim Qostanaı (46,2%-ǵa), Mańǵystaý (45,5%-ǵa) jáne Aqtóbe oblystarynda (45,2%-ǵa) tirkeldi. Sonymen qatar, oń kórsetkish elimizdiń barlyq aımaǵynda baıqaldy», - delingen statıstıkalyq derekte.
2023 jyldyń naýryzymen salystyrǵanda, kóppáterli úılerdegi turǵyn úı mámileleriniń sany 29,7%-ǵa (5 351 mámilege) ósti. Sáýir aıynda páterler boıynsha barlyǵy 23 349 mámile jasaldy, bul mámilelerdiń jalpy sanynyń 74,3%-y. Bólmeler sany boıynsha 2 bólmeli páterler satylymy basym boldy, sáýir aıynda olardyń 8 830-y resimdeldi. Saýdanyń negizgi úlesi Almaty jáne Astana qalalaryna (41,2%) tıesili.
«2023 jyldyń naýryz aıymen salystyrǵanda, jeke turǵyn úıler boıynsha mámileler sany 29%-ǵa (1 821 mámilege) ósip, 8 096-ny qurady. Ósim barlyq aımaq boıynsha tirkeldi, sandyq mánde eń úlken ósim Almaty (+248 mámile), Mańǵystaý (+142 mámile) oblystarynda jáne Shymkent (+131 mámile) qalasynda baıqaldy.
2023 jyldyń sáýirinde turǵyn úıdi satyp alý-satý mámileleri byltyrǵy tıisti aıymen salystyrǵanda 40,1%-ǵa azaıǵan, ol kezde 52 520 mámile resimdelgen bolatyn. Tómendeýdiń eń úlken kórsetkishi Qaraǵandy oblysynda (-68,2%-ǵa) baıqaldy. Sonymen qatar, teris kórsetkish elimizdiń barlyq aımaǵynda tirkeldi. 2023j. qańtar-sáýir aılaryndaǵy mámileler sany 2022j. qańtar-sáýirmen salystyrǵanda da teris dınamıka kórsetti – -48%», - dep jazdy vedomstvo.
