Bıyl «Jasyl el» baǵdarlamasyna 140 myń stýdent qatysady

ASTANA. KAZINFORM – Ǵylym jáne joǵary bilim mınıstriniń orynbasary Talǵat Eshenqulov Úkimet otyrysynda bıyl «Jasyl el» baǵdarlamasyna qansha stýdent qatysatynyn aıtty.

- 2024-2025 oqý jylynda azamattyq joǵary oqý oryndarynda 680 myńnan astam stýdent oqıdy. Onyń ishinde 624 500 bakalavrıatta, 39 200 magıstratýrada, 7 600 myńy doktorantýrada jáne 8 900 rezıdentýrada bilim alyp jatyr. Túlekterdiń eń kóbi kelesi baǵyttarda bilim alyp júr. Pedagogıkalyq mamandyqtar boıynsha – 48 428, bıznes, basqarý jáne quqyq – 24 666, ınjenerlik ǵylymdar – 24 320, aqparattyq-kommýnıkatsııalyq tehnologııalar – 13 393, densaýlyq saqtaý – 10 300 jáne aýyl sharýashylyǵy – 1 776 stýdent, - dedi ol.

Aıtýynsha, bıyl joǵary oqý oryndarynan 177 586 túlek oqýdy bitirip shyǵady.

- Stýdentterdi jumyspen qamtý aıasynda elimizde 30 myńnan astam stýdentti qamtıtyn «Jasyl el» jobalary men qurylys otrıadtary uıymdastyrylǵan. Sondaı-aq, 140 myńǵa jýyq stýdentti qamtıtyn oqý jáne óndiristik praktıka qolǵa alynǵan. Aıta ketý kerek, kásiptik praktıkadan ótý kezinde bilim alýshy belgili bir eńbek mindetterin oryndaıdy, olar bilim alýshynyń eńbek ótiline esepteledi, - dedi vıtse-mınıstr.

Buǵan deıin Ulytaý oblysynda «Jasyl el» baǵdarlamasy aıasynda 700-deı jas jumyspen qamtylatynyn jazǵan edik.