Bıyl Turan jolbarysynyń alǵashqy kúshigin alamyz – Erlan Nysanbaev
ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev Úkimet otyrysynan keıin ótken baspasóz máslıhatynda Turan jolbarysynyń popýlıatsııasyn qalpyna keltirý jumystary qalaı júrip jatqanyn aıtty.
— Biz qazirdiń ózinde naqty faktilerge ıe bolyp otyrmyz. Jyl aıaǵyna deıin Turan jolbarysynyń alǵashqy kúshikterin alamyz dep úmittenip otyrmyz, — dedi mınıstr Baq ókiliniń suraǵyna bergen jaýabynda.
Erlan Nysanbaev bıyl Reseıden taǵy birneshe Turan jolbarysy ákelinetinin eske saldy.
— Aqpan aıynda reseılik áriptesterimizben kezdesý ótti. Bul Turan jolbarysyn qalpyna keltirý baǵytyndaǵy ózara seriktestik jónindegi memorandým aıasyndaǵy jumys tobynyń birinshi otyrysy bolatyn. Biz reseılikterge ózimiz daıyndaǵan ınfraqurylymdy kórsettik. Ózara túsinistik bar. Bıyl taǵy 3-4 jolbarys ákelemiz dep oılaımyn. Osylaısha Turan jolbarysynyń popýlıatsııasyn qalpyna keltirýdiń tolyq aýqymdy baǵdarlamasyna kirisemiz, — dedi mınıstr.
Buǵan deıin de Reseıden Balqashqa 3-4 jolbarys ákelinetinin jazǵan edik.
