Bıyl shalǵaıdaǵy 328 aýyl mektebi ınternetke qosylady

ASTANA. KAZINFORM – 2027 jylǵa deıin 3 myńnan astam aýyldaǵy 2 039 mektepke talshyqty-optıkalyq baılanys jelisi tartylady. Bul týraly Májilis depýtattarynyń saýalyna Premer-Mınıstrdiń orynbasary Ermek Kósherbaevtyń jaýabynda aıtylǵan.

— Qazir shalǵaı eldi mekendegi bilim berý uıymdaryn Internetpen qamtamasyz etý úshin «Starlink» spýtnıktik Internet jelisi pılottyq jobasy (1674 mektep qosyldy) iske asyrylyp jatyr. Oǵan qosa aýyldyq eldi mekenderdi joǵary jyldamdyqty spýtnıktik Internetke qosý úshin Eýroodaqtan beriletin grant aıasynda 2025 jyldyń sońyna deıin 328 aýyldyq eldi mekendi spýtnıktik Internetke qosý kózdelgen. Onyń ústine baılanys salasyndaǵy «Qoljetimdi ınternet» ulttyq jobasy aıasynda 2027 jylǵa deıin 2 039 mektepti qamtıtyn 3 010 aýyldyq eldi mekenge talshyqty-optıkalyq baılanys jelisin salý josparlanǵan, — dedi Ermek Kósherbaev jaýabynda.

Aıta keteıik, ótken jyldyń sońynda Tsıfrlyq damý mınıstrligi Thuraya, Iridium, Inmarsat jáne Starlink spýtnıktik baılanys júıesin jetkizýge jáne paıdalanýǵa tyıym salý kózdelgen buıryq jobasyn jarııa etken bolatyn.  Osyǵan oraı agenttik joldaǵan resmı saýalǵa jaýap bergen vedomstvo qabyldanǵan shara ulttyq qaýipsizdikke tónetin qatermen baılanysty ekendigin alǵa tartady. Óıtkeni, Qazaqstan zańyna sáıkes, shetelden basqaralatyn baılanys jelisin paıdalanýǵa tyıym salynǵan.