Bıyl Prezıdent Qyrǵyzstanǵa barady

ASTANA. KAZINFORM – Bıyl Prezıdent Qasym-Jomart Toqaev Qyrǵyzstanǵa resmı saparmen barady. Bul týraly Premer-mınıstr Oljas Bektenov Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Qasymalıevpen kezdesýde aıtty.

- Sizdiń Astanaǵa alǵashqy resmı saparyńyzdyń erekshe sımvoldyq máni bar. Biz – armany-muraty ortaq, tarıhı tamyry bir, qany da, rýhy da ótken jaqyn baýyrlas eldermiz. Osy tusta ata-babalarymyz amanat etken bereke-birligimizdi saqtap, dostyǵymyzdy bekite túsý ortaq maqsatymyz dep bilemin.  Memleket basshylarymyzdyń ózara senim men shynaıy dostyq rýhyndaǵy turaqty baılanystary bizdiń kóp qyrly qatynastarymyzdy jańa belesterge kóterýge yqpal etti, - dedi ol.

Oljas Bektenov byltyr Qyrǵyz Prezıdentiniń Qazaqstanǵa resmı saparmen kelgenin eske aldy.

- Bıyl Qazaqstan Prezıdenti Qasym-Jomart Kemeluly Toqaevtyń Qyrǵyzstanǵa sapary josparlanyp otyr. Bul ekijaqty baılanystardyń odan ári damýyna tyń serpin beretini sózsiz. Bizdiń búgingi kezdesýimiz joǵarǵy deńgeıde ótetin aldaǵy kelissózderdi sapalyq jaǵynan tolyqtyra túsý úshin ekijaqty kún tártibiniń ózekti máselelerin talqylaýǵa múmkindik beredi, - dedi Premer-mınıstr.

Eske salsaq Prezıdent Qasym-Jomart Toqaev Iordanııa Korolimen kelissóz júrgizgen edi.