Bıyl Pavlodarda onǵa jýyq sýburqaq jóndeledi
PAVLODAR. KAZINFORM - Oblys ortalyǵynda kommýnaldyq balansta 22 sýburqaq bar. Olardy kútip ustaýǵa, aǵymdaǵy jóndeýler júrgizýge qala bıýdjetinen 76 mln teńgeden astam qarajat bólingen.
Pavlodar qalasyndaǵy sýburqaqtar retke keltirile bastady. Qala ákimdiginiń aqparynsha, búginde 22 sýburqaq bar, olarǵa «Kommýnservıs» mekemesi jaýapty.
- 22 sýburqaqtyń 19-y statıstıkalyq sýburqaqtar bolsa, ekeýi qurǵaq, taǵy bireýi dınamıkalyq mýzykalyq qurǵaq sýburqaq. Bul nysandar jaz mezgilinde aýany ylǵaldandyryp, tazartý arqyly qala ekologııasyn jaqsartady. Iondalýdy kúsheıtip, shahar shýyn azaıtady. Sondaı-aq ósimdikterdiń ósýine qolaıly mıkroklımat jasaıdy, - dep málimdedi ákimdikten.
Keıingi eki jylda «Kaskad», «Ortalyq», «Aınalaıyn», «Lomov-Sátbaev» sýburqaqtarynda aǵymdaǵy jóndeýler júrgizilgen. Bıyl taǵy 8 sýburqaqty, atap aıtqanda, «Baıanaýyl» saýda úıi, «J.Aımaýytov teatry», «Rýslan men Lıýdmıla», «Sátbaev» jáne taǵy basqalaryn aǵymdaǵy jóndeýden ótkizý josparlanǵan. Qazirgi ýaqytta Máshhúr Júsip atyndaǵy ortalyq meshittiń janyndaǵy sýburqaqtarda aǵymdaǵy jóndeý jumystary bastalyp ketken.
- Sýburqaqtardy kútip ustaýǵa, aǵymdaǵy jóndeýler júrgizýge, operatorlardyń eńbekaqysy men kommýnaldyq tólemderdi tóleýge, ózge de shyǵyndardy óteýge bıyl bıýdjetten 76,031 mln teńge qarastyryldy. Negizgi másele, sýburqaqtardyń tozýyna qatysty qalyptasyp otyr.
Olardyń barlyǵy kezegimen jóndeledi, - dep qosty ákimdikten.
Eske sala keteıik, Almatyda mamyr aıynan bastap sýburqaqtar iske qosylady.
