Bıyl kúrish pen maqta egistikteri azaıady
ASTANA. KAZINFORM — Búgin Úkimet otyrysynda Aýyl sharýashylyǵy mınıstri Aıdarbek Saparov maqta men kúrish egiletin alańdarǵa qatysty túsinik berdi.
— Respýblıkanyń ońtústik óńirlerinde kúrish pen maqta sııaqty sýdy kóp qajet etetin daqyldar alańdaryn ońtaılandyrý jumystary jalǵasyp jatyr. Mysaly, sý paıdalaný lımıtine sáıkes kúrish alańy 20,2 myń gektarǵa qysqartyldy, — dedi Aıdarbek Saparov.
Onyń aıtýynsha, maqtanyń egistikteri 162,4 myń gektar bolyp, onyń ishinde tamshylatyp sýarý alańy 29,8 myń gektarǵa kóbeıedi, al dástúrli sýarý ádisteri qoldanylatyn alańdar 12 myń gektarǵa qysqarady.
— Joǵaryda atalǵan egis alqaptarynyń qurylymy ishki qajettilikti tolyq qamtamasyz etý úshin qajetti kólemde ónim alýǵa múmkindik beredi. Osy oraıda 2026 jylǵa arnalǵan osy qurylymdy jáne ártaraptandyrý boıynsha jańa ındıkatorlardy bekitý usynylady, — dedi mınıstr.
Aıta keteıik, buǵan deıin Úkimet kóktemgi egis jumystaryna daıyndyq barysyn pysyqtaıtynyn jazǵan edik.
