Bıyl elimizde 20-dan astam iri halyqaralyq jarys ótedi
ASTANA. KAZINFORM – Byltyr elimiz boıynsha 30-ǵa jýyq ártúrli deńgeıdegi halyqaralyq jarys ótip, kóptegen sport túrinen halyqaralyq federatsııanyń ókilderi kelip, eldiń sporttyq ál-aýqatymen tanysqan bolatyn. Bıyl da el aýmaǵynda álemdik jáne qurlyqtyq deńgeıdegi 20-dan astam iri halyqaralyq jarys ótkizý josparlanǵan. Bul týraly Týrızm jáne sport mınıstrliginiń baspasóz qyzmeti habarlady.
Jarystar Almaty, Astana, Shymkent, Túrkistan, Talǵar jáne Aqtaý qalalarynda ótip, qysqy, jazǵy, olımpıadalyq jáne paralımpıadalyq sport túrlerin qamtıdy.
Mılandaǵy aq Olımpıada aıaqtala salysymen Almatyda Frıstaıl-mogýldan álem kýbogy kezeńi men FIP GOLD ALMATY halyqaralyq padel týrnırin, WKF karateden KazOpen halyqaralyq týrnırin jáne WKF karateden Azııa chempıonatyn, barlyq jas sanattary boıynsha djıý-djıtsýdan Azııa chempıonatyn uıymdastyrý josparlanǵan. Al jyl saıyn dástúrli túrde uıymdastyrylatyn «XXXIV Memorıal – Ǵ.Qosanov» halyqaralyq jeńil atletıka jarysy men Denis Ten Memorial Challenge Series mánerlep syrǵanaýdan halyqaralyq týrnıri Almatyda ótedi.
Elorda da birqatar mańyzdy baıraqty básekeni qabyldaıdy. 2025/2026 maýsymyna arnalǵan UEFA fýtzaldan Chempıondar lıgasynyń fınaly men tórtinshi ret ótetin dzıýdodan Grand Slam týrnırin kópshilik tamashalaı alady. Osy jarystarmen qatar erler men áıelder arasyndaǵy Silk Way Series Kazakhstan-1,2 halyqaralyq jarystary, júzý men bochchadan álem kýbogtary, golboldan jastar arasyndaǵy álem chempıonaty men Astana Open Series Kazakhstan-1,2 halyqaralyq jarystary uıymdastyrylady.
Sondaı-aq bıyl Astanada fıdjıtal sporttan «Bolashaq oıyndary» halyqaralyq mýltısporttyq týrnıri ótedi.
Talǵarda kópkúndik velojarystan Azııa kýbogyn, Shymkentte ISSF stend atýdan álem kýbogy men maýntınbaıktan (MTB) Azııa kýbogyn, al Túrkistanda para kanoeden Azııa chempıonatyn ótkizý josparlanǵan. Bul jarystardyń barlyǵy Qazaqstannyń álemdik sport qaýymdastyǵynyń senimdi seriktesi jáne iri halyqaralyq jarystardy qabyldaı alatyn zamanaýı sporttyq alań ekenin taǵy bir márte dáleldeıdi.
Budan buryn 2029 jylǵy qysqy Azııa oıyndary Almatyda ótetinin jazǵanbyz.