Bıyl bankterge BJZQ-dan qansha aqsha beriledi

ASTANA. KAZINFORM – Ulttyq banktiń Monetarlyq operatsııalar departamentiniń dırektory Nurjan Tursynhanov Biryńǵaı jınaqtaýshy zeınetaqy qorynan ekinshi deńgeıli bankterge bıyl qansha qarajat beriletinin aıtty.

- Aıtqandaryńyz durys. 2025-26 jyldarǵa BJZQ-nyń 1,5 trln teńgesin naryq sharttarymen kvazımemlekettik sektordyń qundy qaǵazdaryna baǵyttaý týraly baǵdarlama qabyldanǵan bolatyn. Onyń ishinde 500 mlrd teńgedeı aqshany 2024-25 jyldary ekinshi deńgeıli bankterdiń oblıgatsııalaryna ınvestıtsııalaıtynyn jarııalady, - dedi ol.

Ulttyq bank ókili ekinshi deńgeıli bankter ekonomıkadaǵy negizgi nesıe berýshilerdiń biri bolǵandyqtan salymshylardyń aqshasyn baǵyttaý tıimdi sheshim bolyp esepteletinin atap ótti.

- 2024 jyly «Halyq bank» pen «RBK» bankke 220 mlrd teńgedeı aqsha ınvestıtsııalandy. Bul aqshanyń bári naryq sharttarymen berilgenin basa aıtý kerek. Mysaly, belgilengen mólsherleme týraly aıtsaq, keshe Qazaqstannyń qundy qaǵazdarynyń ortasha kiristiligi 14 paıyz ekeni aıtyldy. Odan ári ár banktiń kórsetkishine baılanysty nesıe táýekeliniń syıaqysy bar. Bıyl da osy jumysty jalǵastyrýǵa nıettimiz. Qazir BJZQ-da 22,4 trln teńge bolsa, ekinshi deńgeıli bankterge salǵan ınvestıtsııalardyń portfeli sonyń 5 paıyzynan tómen, - dedi Nurjan Tursynhanov.

Buǵan deıin Ulttyq bank tóraǵasynyń orynbasary Aqyljan Baımaǵambetov Biryńǵaı jınaqtaýshy zeınetaqy qorynyń aqshasy qandaı jobalarǵa ınvestıtsııalanatynyn aıtqan edi. Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva Senatta ótip jatqan dóńgelek ústelde BJZQ-daǵy qarjysy azaıyp qalǵanyna jıi shaǵymdanatyn salymshylar týraly pikir bildirgen edi.