Bıyl áskerı sherý óte me

ASTANA. KAZINFORM — Bıyl Otan qorǵaýshylar kúni qarsańynda áskerı sherý ótpeıdi. Bul týraly Qorǵanys mınıstrligi habarlady. 

— Bıyl áskerı sherý ótkizý josparlanbaıdy. Degenmen 7 mamyr qarsańynda birqatar áskerı-patrıottyq is-shara bastalady. Respýblıka boıynsha erlik sabaqtary, úzdik áskerı qyzmetshiler men ardagerlerdi qurmetteý, ekologııalyq aktsııalar ótedi. Sondaı-aq áskerı orkestrler sherýi men shyǵarmashylyq ujymdardyń óner kórsetýi josparlanǵan, — dep jaýap berdi mınıstrliktiń baspasóz qyzmeti agenttik saýalyna.

Sonymen birge, áskerı tehnıka men qarý-jaraq kórmesi, «Sarbaz botqasy» naýqany men ashyq esik kúnderi uıymdastyrylmaq.

Atalǵan is-sharalar 10 mamyrǵa deıin jalǵasady.

Eske sala ketsek, 1992 jyly 7 mamyrda Qazaqstan Respýblıkasy Prezıdentiniń Qarýly kúshterdi qurý týraly № 745 Jarlyǵy jarııalandy. Jarlyqta otandyq qarýly kúshti qalyptastyryp, ol úshin tıisti jaǵdaı jasaý kerektigi aıtylǵan. Bul — el tynyshtyǵyn qorǵap, beıbitshilikti qamtamasyz etetin áskerı qyzmetshilerdi quttyqtap, qurmet kórsetetin kún.