Bıyl Almatydan 4 jańa áýe baǵyty ashylady
ALMATY. KAZINFORM – Almatyda 2026 jyly halyqaralyq áýe baǵyttary men reısteriniń sany artady. Bul týraly Almaty qalasynyń týrızm basqarmasy habarlady.
2026 jyldyń mamyr aıynan bastap Varshavaǵa (Polsha) turaqty reıster, al maýsym aıynan bastap jazǵy baǵdarlama aıasynda Kıprge ushaqtar qatynaı bastaıdy. Sondaı-aq bıyl Almatydan Tokıoǵa (Japonııa) men Shenchjenge (Qytaı) jańa reıster iske qosylýy tıis.
Týrızm basqarmasynyń málimetinshe, jańa baǵyttar boıynsha reıs aptasyna eki ret oryndalady dep josparlanǵan. Bul týrıstik aǵynnyń artýyna septigin tıgizip, megapolıske sheteldik qonaqtardy kóbirek tartýǵa múmkindik bermek.
Sonymen qatar qoldanystaǵy baǵyttar boıynsha, ásirese Qytaımen aradaǵy reıster sany artady. Ótken jyldyń sońynda Chendý qalasyna reıs ashylǵan bolatyn. Jalpy búginde Almaty men Qytaıdyń Beıjiń, Shanhaı, Gýanchjoý, Úrimji jáne Hanchjoý sııaqty qalalary arasynda áýe qatynasy bar. Osylaısha, Almaty men Qytaı arasyndaǵy reıster sany aptasyna 84-ke jetpek.
Eske salaıyq, buǵan deıin Erevan, Almaty jáne Aqtaý qalalaryn jańa áýe baǵyttary baılanystyratynyn jazǵanbyz.