Bıyl Aqtóbede 70 aýyl mobıldi ınternetpen qamtylady
Aqtóbe oblysy boıynsha 315 aýyl bar. Qazirgi kezde onyń 221-i mobıldi ınternetpen qamtylǵan. Bıyl taǵy 70 aýylda mobıldi ınternet qoldanysqa engiziledi, dep habarlaıdy Kazinform.
Aqtóbe qalasynda bıyl IT HUB ashylyp, jumys istep tur. Bul IT salasyn damytý jáne startap-mádenıetti qalyptastyrýǵa baǵyttalǵan biregeı joba.
– Habtyń ashylýy jastardy tehnologııalyq kásipkerlikte qoldaýǵa, bilim berý, bıznes-ınkýbatsııalyq baǵdarlamalardy ilgeriletýge jáne ınnovatsııalyq qaýymdastyqtardyń qurylýyna yqpal etedi. Aqtóbe IT HUB aıasynda oblystyń 20 myńnan astam adamyn qamtý, 100 is-shara ótkizý, 50-den astam ınkýbatsııalyq baǵdarlamany iske qosý jáne 25 jobany júzege asyrý josparlanyp otyr, - dedi Aqtóbe oblystyq tsıfrlyq tehnologııalar basqarmasynyń basshysy Áset Otarbaev.
Onyń aıtýynsha, IT salany damytýdyń negizgi faktory – ınternet. Sondyqtan aýylǵa jeli tartý jumystary jandandy. Qazir oblysta 315 aýyl bolsa, onyń 221-i mobıldi ınternetpen qamtylǵan. «Aqtóbe oblysynyń aýmaǵynda baılanysty damytýdy iske asyrý» Jol kartasyna sáıkes bıyl 67 aýyldy mobıldi ınternetpen qamtý josparlanǵan.
– Jol kartasyna sáıkes búgingi kúni 67 aýyldyń 12-si mobıldi ınternetke qosylǵan. Qalǵan 55 eldimekende aýdan ákimdikteri baılanys operatorlarymen birlesip jumys isteýde. Bıyl jobadan tys qosymsha 3 eldimekendi mobıldi ınternetpen qamtý úshin jumys júrgizilip jatyr. Nátıjesinde osy jyldyń aıaǵyna deıin 283 aýyl mobıldi ınternetpen qamtylady. Sonymen qatar 29 aýylǵa ınternetti qoǵamdyq Wi-Fi arqyly uıymdastyrý qarastyryldy. Internet jyldamdyǵy – 50-100 Mbıt/s, qamtý radıýsy – 1,5 shaqyrym. Qoǵamdyq Wi-Fi turǵyndarǵa tegin beriledi, - dedi Aqtóbe oblystyq tsıfrlyq tehnologııalar basqarmasynyń basshysy Áset Otarbaev.
Qazirgi kezde oblysta 400-den astam mektep bar. Qalanyń barlyq mektebinde jáne aýyldyq jerlerdegi 74 bilim ordasynda ınternet talshyqty-optıkalyq baılanys jelileri arqyly, al 193 mektepte radıorelelik baılanys arqyly uıymdastyrylǵan. Sonymen birge 16 mektep spýtnık arqyly qosylǵan. Qazirgi kezde qaýipsizdik úshin «Alaqan mektep» jobasy da jumys istep tur.
– Memleket basshysy Qasym-Jomart Toqaev balalar qaýipsizdigine basa nazar aýdarýdy tapsyrdy. Biz «Alaqan mektep» júıesin iske qosyp otyrmyz. Ata-ana balasynyń mektepke qaı ýaqytta kirgenin, qandaı tamaq alǵanyn, kitaphanaǵa baryp-barmaǵanyn, qandaı kitap alǵanyn bilip otyrady. Sonymen birge jeke shkafty ashqan ýaqytyn, mektep avtobýsynyń qyzmeti týraly tegin qosymsha arqyly habarlanady. Barlyq júıe balanyń alaqany arqyly jumys isteıdi. ıAǵnı, qoly tıgen boıda kim ekeni anyqtalyp, habarlama túsedi. Qazirgi kezde bul júıeni barlyq mektepke engizý úshin mamandar jumys istep jatyr. Bir mektepke qondyrý quny – 10 mıllıon teńge, - dedi Áset Otarbaev.
Mektepterde emes, qala kóshelerinde de qaýipsizdik úshin beınebaqylaý kamerasy kóbeıedi. Bıyl óńirdegi barlyq kamerany bir júıege biriktilip, baqylaýǵa arnalǵan júıe iske qosylady. Jol qaýipsizdigine basymdyq berilip, Aqtóbe qalasy men 9 eldimekende 2 500-ge jýyq beınebaqylaý kamerasy qondyrylyp, jol erejeleriniń saqtalýyn baqylaıtyn 94 keshen ornatylady. Sonymen birge órtti anyqtap, habar beretin 24 keshen de iske qosylýy tıis. Jospar boıynsha qaladaǵy aýla, sýpermarket, kópshilik jınalatyn oryndardaǵy 2 700-den astam kamera da bir jelige qosylady. Beınematerıaldyń bári 30 kún saqtalady. Jobany iske asyrý úshin 2023-2025 jyldarǵa 5,5 mıllıard teńge qarastyrylǵan. Oblysta energetıka jáne turǵyn úı kommýnaldyq sharýashylyǵy, densaýlyq saqtaý salalary da avtomattandyrylyp jatyr.
– Tabıǵı monopolııa sýbektisiniń 40 qyzmetin bir jerge toǵystyrǵymyz keledi. Osy arqyly turǵyndar qashyqta otyryp-aq olardyń qyzmetine júgine alady. Elektrondy túrde kelisimshart jasaýǵa múmkindik bolady. Bul – qyzmetti paıdalaný kezinde jemqorlyq faktilerin joıýǵa septigin tıgizetin júıe. «Feldsher sómkesi» jobasy da iske asyrylyp jatyr. Bul shalǵaı aýyl turǵyndarynyń bilikti dárigerlerge qaralyp, em qabyldaýyna múmkindik jasaıdy. Barlyǵy 138 sómkeni salyp alýǵa 1 mıllıard teńge bólindi, - dedi Aqtóbe oblystyq tsıfrlyq tehnologııalar basqarmasynyń basshysy Áset Otarbaev.
