Bıyl aqyly joldardaǵy tarıf ózgere me

ASTANA. KAZINFORM — Bıyl Qazaqstan aýmaǵynda qandaı aqyly joldar paıda bolady? Osy jyly aqyly joldardaǵy tarıf ózgere me? Bul suraqtarǵa QR Kólik mınıstrligi jaýap berdi.

- Qazirgi kezde elimiz boıynsha jalpy uzyndyǵy 3,2 myń shaqyrym 17 aqyly ýchaske jumys istep tur. Aqyly joldar jelisin odan ári damytý aıasynda jalpy uzyndyǵy 2,2 myń shaqyrym bolatyn taǵy 10 ýchaskeni engizý josparlanǵan. «Balqash – Býrylbaıtal» (91 km) avtomobıl jolynda jeńil avtomobılder men júk avtokólikteri úshin aqy alý qarastyrylǵan. «Aqtóbe – Orynbor» (83 km), «Qostanaı – Troıtsk» (163 km), «Qyzylorda – Aral» (455 km), «Aqtaý – Beıneý» (454 km), «Qostanaı – Denısovka» (169 km), «Úsharal – Dostyq» (180 km), «Qandyaǵash –Maqat» (385 km), «Taraz qalasyn aınalyp ótý» (57 km) jáne «Shý – Býrylbaıtal» (184 km) syndy ýchaskelerde tólem tek júk kólikterinen alynady, - delingen mınıstrliktiń Kazinform agenttigine bergen jaýabynda.

Vedomstvo aqaparatyna qaraǵanda, bıyl elimizdegi avtojoldardyń aqyly ýchaskelerindegi tarıfter orta eseppen 30 paıyzǵa ósýi josparlanǵan. Tarıfterdi kóterýden túsken qarajat joldardy kútip-ustaýǵa, jańa arnaıy jol tehnıkasyn satyp alý shyǵystaryn jabýǵa, sondaı-aq avtojol ınfraqurylymynyń normatıvtik jaǵdaıyn qamtamasyz etýge baǵyttalady.

- Jergilikti turǵyndardy qoldaý úshin 15 paıyzǵa deıin jeńildikter, abonementter satyp alý múmkindigi, sondaı-aq turaqty jolaýshylar tasymalyn júzege asyratyn avtobýstar úshin tólemnen tolyq bosatý sııaqty sharalar qarastyrylǵan. Aqaýlary bar ýchaskelerde jóndeý aıaqtalǵanǵa deıin aqy alynbaıdy. Tarıfterdi kóterý qozǵalys qaýipsizdigin qamtamasyz etýge, joldardyń sapasyn jaqsartýǵa jáne eldiń avtojol ınfraqurylymyn odan ári damytýǵa baǵyttalǵan. Birinshi kezekte atalǵan shara tranzıttik kólikterge qatysty bolady, ıaǵnı tıisti qadamdar aqyly joldardyń turaqty damýyn qamtamasyz etýge múmkindik beredi, - dep atalyp ótken mınıstrlik málimetinde.

Buǵan deıin «Úsharal-Dostyq» trassasy aqyly joldar qataryna kirýi múmkin ekenin jazǵan edik.

Byltyr Kólik mınıstri Marat Qarabaev aqyly joldyń aqshasyn tólemegenderge avtomatty túrde aıyppul belgileý qalaı iske asatynyn aıtty.