Bıyl 92% oqýshy lagermen qamtylady — mınıstrlik

ASTANA. KAZINFORM – Jaqynda oqýshylar úshin jazǵy lager maýsymy bastalady. Dál qazir balalarǵa arnalǵan demalys oryndaryna sanıtarııalyq-epıdemıologııalyq qorytyndy berý jumystary júrip jatyr.

Ótken jyly elimizde tekseristen ótpeı, zańsyz jumys istegen 5 jazǵy lager anyqtalǵan edi. Al balalarǵa arnalǵan demalys oryndarynyń bıylǵy daıyndyǵy qandaı? QR Oqý-aǵartý mınıstrligi Tárbıe jáne qosymsha bilim berý departamentiniń basqarma basshysy Altaı Rahymberlın Kazinform tilshisine jaýap berdi.

— Jalpy, búgingi kúni lagerler tarapynan Sanıtarııalyq-epıdemıologııalyq baqylaý departamentterine qorytyndy alý ótinimder berilip jatyr. Sol ótinim negizinde Sanıtarııalyq-epıdemıologııalyq baqylaý departamentteriniń ókilderi lagerlerge shyǵyp, Densaýlyq saqtaý mınıstrligi tarapynan bekitilgen talaptarǵa sáıkestigin tekseredi. Qorytyndy berilgen soń, óńirlerde oblys ákimderiniń qaýlysymen bekitilgen vedomstvoaralyq shtabtardyń mamandary jazǵy lager maýsymy bastalmaı turyp, aldyn ala sol lagerlerdiń jaǵdaıyn tekseredi, — deıdi basqarma basshysy.

Altaı Rahymberlın bıyl 92% oqýshy jazǵy lagermen qamtylatynyn aıtady.

— Elimizde jyl boıy jumys isteıtin 16 lager bar. Onda 15 myńnan astam bala qamtylady dep josparlap otyrmyz. Sonymen qatar, 3 aı jumys isteıtin 188 maýsymdyq lager bar. Ol jerde 160 myńnan astam bala qabyldanady dep josparlanǵan. Oǵan qosa, 10 myńnan astam mektep janyndaǵy lagerler oqýshylardy qabyldaıdy, — deıdi ol.

Lagerge baratyn balalardyń tizimi eń aldymen mektep ishinde jasaqtalady. Keıin usynymdar bilim bólimine jáne bilim basqarmasyna jóneltiledi.

— Mınıstrliktiń 2020 jylǵy 24 sáýirdegi №158-buıryǵy bar. Sol buıryqta basymdyq áleýmettik kómek alatyn, áleýmettik osal toptan shyqqan, jetim, daryndy jáne mektep ishindegi joǵary kórsetkishterge jetken balalarǵa beriledi, - dedi Altaı Rahymberlın.

Mınıstrlik ókili jaz ýaqytynda árbir ata-ana balasyn lagerge jiberý úshin ózi tikeleı ótinish bere alatynyn jetkizdi.

— Biz qosymsha bilim berý boıynsha biryńǵaı platformany ázirlep jatyrmyz. Qazir tehnıkalyq daıyndyq jumystary júrgizilýde. Platforma daıyn bolǵan kezde ata-ana ózi balasyn lagerge jiberýge ótinim bere alady, — deıdi QR Oqý-aǵartý mınıstrligi Tárbıe jáne qosymsha bilim berý departamentiniń basqarma basshysy.

Lagerde qyzmet etetin pedagogterge de talap qatań. Balalarǵa arnalǵan jazǵy demalys oryndarynda tek pedagogıkalyq bilimi bar mamandar ǵana qyzmet ete alady.

— Jetekshiler men pedagogterde pedagogıkalyq bilim bolýy kerek. Biliktilik talaptary Qazaqstan Respýblıkasy Bilim jáne ǵylym mınıstriniń 2009 jylǵy 13 shildedegi 338-buıryqta kórsetilgen. Sol talaptarǵa sáıkes bolǵan jaǵdaıda pedagogter jumys isteı alady.

Lagerler jergilikti atqarýshy organdarǵa qarasty bilim basqarmalaryna baǵynyshty. Soǵan sáıkes jergilikti bıýdjetten qarjylandyrylady.

Aıta keteıik, sanıtarııalyq-epıdemıologııalyq baqylaý komıteti lagerlerdiń jazǵy demalysqa daıyndyǵyn baqylaýǵa kiristi.