Bıyl 805 pedagog-kásibı baǵdar berýshi oqytylady
ASTANA. KAZINFORM — Sáýir aıynan bastap oqýshylardyń kásiptik baǵdarlanýy boıynsha orta bilim berý pedagogteriniń biliktilikterin arttyrý kýrstary bastalady. Bul týraly Oqý-aǵartý mınıstrliginiń baspasóz qyzmeti habarlady.
2025 jyly 805 pedagogti oqytý josparlanýda. Kýrstar aıasynda olardyń kásibı jáne tulǵalyq qasıetterin damyta otyryp, zamanaýı álemdik tendentsııalardy zertteýine, kásiptik baǵdar berýdiń túrli ádisteri men formattaryn ıgerýine múmkindik beriledi. Baǵdarlamada praktıkalyq sabaqtar, talqylaýlar, keısterdi taldaý jáne kóshpeli semınarlar qamtylady. Uıymdastyrýshylar atap ótkendeı, kýrstar kásiptik baǵdar berý boıynsha pedagogterdiń biliktiligin arttyrýǵa, kásiptik baǵdar berý is-sharalaryn júrgizýde jáne oqýshylarǵa mamandyq tańdaý boıynsha keńes berýde olardyń praktıkalyq daǵdylaryn damytýǵa baǵyttalǵan.
— Kásiptik baǵdarlaýdyń negizgi mindetteriniń biri — joǵary synyp oqýshylarynyń ártúrli kásipter týraly aqparatty synı turǵydan qabyldaýy men taldaý daǵdylaryn qalyptastyrý. Bolashaq mamandyqty sanaly túrde tańdaý oqýshylarǵa pánderdi oqýǵa kóbirek kóńil bólýge, olardyń mansap úshin mańyzdylyǵyn túsinýge, demek akademııalyq úlgerimdi arttyrýǵa kómektesedi. Sonymen qatar kásiptik baǵdarlaý oıyndary, sheberlik synyptary men trenıngter oqýshylardyń kommýnıkatıvti, analıtıkalyq jáne shyǵarmashylyq daǵdylaryn damytýǵa múmkindik beretin suranysqa ıe quraldarǵa aınalýda. Osy ádisterdiń barlyǵyn pedagogter kýrs aıasynda úırenedi, — dep atap ótti «Órleý» basqarmasynyń tóraǵasy Aıdana Shılıbekova.
Oqytýǵa otandyq jáne halyqaralyq jetekshi sarapshylar qatysady. Kýrs baǵdarlamasy úsh aptaǵa arnalǵan, sodan keıin muǵalimder biliktilikti arttyrý sertıfıkattaryn alady. Ol jyl sońyna deıin iske asyrylatyn bolady.
Aıta ketelik elimizdiń óńirlerinde muǵalim tapshylyǵy áli de bar ma? Qaı pánder boıynsha muǵalimder jetispeıdi? Bul suraqtarǵa Oqý-aǵartý mınıstrligi jaýap bergen edi.