Bıyl 14 myńnan astam ınternet-alaıaqtyq tirkeldi

ASTANA. KAZINFORM —  Bas prokýratýrada kıberalaıaqtyqqa qarsy is-qımyl máseleleri jónindegi vedomstvoaralyq keńes ótti. 

Keńeske Ulttyq bank, Qarjy naryǵyn retteý jáne damytý agenttigi, Іshki ister mınıstrligi, Tsıfrlyq damý, ınnovatsııalar jáne aeroǵarysh ónerkásibi mınıstrligi, Saýda jáne ıntegratsııa mınıstrligi, Mádenıet jáne aqparat mınıstrligi, sondaı-aq «Astana» halyqaralyq qarjy ortalyǵynyń ókilderi qatysty.

Sońǵy jyldary ınternet-alaıaqtyq tek jahandyq problema ǵana emes, ulttyq qaýipsizdikke tóngen eleýli qaterge aınaldy. Tehnologııalardyń damýy men tsıfrlyq kommýnıkatsııanyń keńeıýine baılanysty qaskúnemder alaıaqtyqtyń kúrdelengen tásilderin qoldanýda.

Atalǵan qylmystar azamattarǵa aıtarlyqtaı qarjylyq shyǵyn keltirip, qupııa aqparattyń taralýyna alyp kelýde, sonymen qatar memlekettiń jalpy ekonomıkasyna zııan tıgizýde.

— Bıyl 14 myńnan astam ınternet-alaıaqtyq tirkeldi, bul ótken jyldyń tıisti kezeńimen salystyrǵanda 22%-ǵa kóp. Keltirilgen zalal 6 mıllıard teńgeden asty, onyń 26%-y jábirlenýshilerge óteldi.

Alaıaqtarǵa ózderiniń tólem quraldaryn bergen 217 dropper qylmystyq jaýaptylyqqa tartyldy. 61 kıberqylmystyq top áshkerelenip, jalpy somasy 2,9 mıllıard teńgeden asatyn kúdikti tranzaktsııalar buǵattaldy, — delingen habarlamada.

Jábirlenýshilerdiń quqyqtaryn qorǵaý boıynsha jumys jalǵasyp jatyr. Atap aıtqanda, alaıaqtyq jolmen resimdelgen nesıelerdiń tólemin toqtatý jáne dropperlerden negizsiz alynǵan qarajatty óndirip alý sharalary qabyldanýda.

Keńes barysynda ınternet-alaıaqtyqtyń ósý sebepteri, jeke derekterdiń zańsyz taralýy, SIM-kartalardyń kóleńkeli aınalymy jáne SIP-telefonııany paıdalaný máseleleri qaraldy.

Nátıjesinde, qalyptasqan ahýalǵa jan-jaqty taldaý júrgizilip, naqty is-sharalar belgilendi jáne olardy iske asyrýǵa jaýapty memlekettik organdar aıqyndaldy.

Sonymen qatar, osy jyldyń aqpan aıynda ınternet-alaıaqtyqqa qarsy is-qımyl máseleleri boıynsha ótken B.Asylov tóraǵalyq etken Zańdylyqty, quqyqtyq tártip pen qylmysqa qarsy kúresti qamtamasyz etý jónindegi úılestirý keńesiniń sheshimderiniń oryndalý barysyna erekshe nazar aýdaryldy. Osy baǵyttar boıynsha ýákiletti organdardyń esebi tyńdaldy.

Jalpy, jábirlenýshilerdiń quqyqtaryn qorǵaý jáne kıberalaıaqtyqqa qarsy kúres — prokýratýra organdary qyzmetiniń basym baǵyttarynyń biri.

— Qyrkúıek aıynan bastap Qylmystyq kodekske engizilgen 232-1-bap kúshine enedi. Onda óz tólem quraldaryn materıaldyq syıaqy úshin úshinshi tulǵalarǵa zańsyz bergen dropperlerdiń qylmystyq jaýaptylyǵy kózdelgen. Bul quqyq buzýshylyq úshin tek qarjylyq shekteýler ǵana emes, 7 jylǵa deıingi merzimge bas bostandyǵynan aıyrý jazasy da qarastyrylǵan, — delingen habarlamada.

Eger sizdiń shotyńyzdy bógde adamdar paıdalanyp jatsa, dereý bankke habarlasyp, ne bolmasa onlaın-bankıng arqyly kartańyzdy buǵattaýǵa keńes beremiz.

Aıta ketelik Bas prokýratýra «SK-Farmatsııa» ústinen qylmystyq tekserýdi bastaǵan edi.