Qazaqstan jazda Qytaıda ótetin aýqymdy tehnologııalyq forýmǵa qatysady
ASTANA.KAZINFORM - Qytaı astanasynda qytaılyq jasandy ıntellekt sheshimderin jahandyq ekojúıege ıntegratsııalaýǵa jáne tehnologııalyq seriktestiktiń jańa formattaryn ázirleýge arnalǵan halyqaralyq «JXQ jasandy ıntellekt forýmy» ótti, dep habarlaıdy Kazinform agenttiginiń Beıjińdegi tilshisi.
Tsıfrlyq qalalardyń jahandyq alıansynyń bas hatshysy ıÝ Tszın el astanasynyń jasandy ıntellekt sektorynyń aýqymyn tanystyrdy. Beıjińde 2500-den astam mamandandyrylǵan kompanııa ornalasqan, al salanyń negizgi segmenti 450 mıllıard ıýanǵa (shamamen 66 mıllıard dollar) jetti.
Spıkerdiń aıtýynsha, Qytaıdyń Ortalyq kıberkeńistik ákimshiliginde 223 iri model tirkelgen, bul jalpy ulttyq kólemniń 40%-dan astamyn quraıdy.
Salany yntalandyrý úshin Beıjiń bıligi maqsatty qoldaý sharalaryn júzege asyryp keledi. Memleket esepteý qýaty shyǵyndaryn 50%-ǵa deıin sýbsıdııalaıdy jáne shaǵyn jáne orta bıznes úshin 30%-ǵa deıin jeńildikter usynatyn vaýcher júıesin engizip jatyr. Jańa býyn neırondyq jelilerdi oqytýdyń negizi bolýy tıis joǵary sapaly derekter jıyntyǵyn jasaýǵa mańyz berip otyr.
Beıjińde ornalasqan tsıfrlyq ıntellekt kompanııasy BEDI-diń aǵa ǵylymı qyzmetkeri Doý Detszın álemdik ekonomıkanyń transformatsııasy aıasynda damýshy naryqtar eń qarqyndy ósimdi kórsetip jatqanyn atap ótti. Ol bul turǵyda jasandy ıntellektiniń jahandanýy tehnologııalardy jergilikti stsenarıılerge beıimdeý, sáıkestikti qamtamasyz etý jáne transshekaralyq derekter aǵynyn retteýde qıyndyqtarǵa toly ekenin túsindirdi.
Qytaı-Benılıýks saýda palatasy dırektorlar keńesi tóraǵasynyń orynbasary Per Mırochnıkov Adre Qytaıdyń jasandy ıntellektiniń damýy úshin perspektıvaly baǵyttar retinde Qazaqstan men Ońtústik-Shyǵys Azııa elderiniń rólin atap ótti.
- Bul naryqtarǵa tikeleı qol jetkizý kóbinese mádenı jáne ákimshilik kedergilermen qıyndaıdy. Bul konfıgýratsııada Eýropa retteýshi mehanızmder men joǵary senim standarttaryn usynatyn «jumsaq alań» retinde áreket ete alady, - dep qosty ol.
«Tsıfrlyq qalalardyń jahandyq alıansynyń» ókili Kazinform tilshisine bergen suhbatynda uıymnyń Qazaqstanmen seriktestigin keńeıtý nıetin aıtty.
- Bıyl birqatar birlesken is-shara josparlanǵan. Qazaqstan delegatsııasy osy jazda Qytaıda ótetin aýqymdy tehnologııalyq forýmǵa qatysady dep josparlanǵan, al kúzde Qytaıdyń jetekshi IT kompanııalarynyń basshylary Qazaqstandaǵy Digital Bridge forýmyna keledi, - dep atap ótti ol.
Biz buǵan deıin Qytaıdyń jasandy ıntellektti qoldana otyryp, onlaın-kommertsııany damytýdy josparlap otyrǵanyn habarlaǵan bolatynbyz.
