Beıjińde álemdegi eń iri halyqaralyq avtokórme ashyldy
ASTANA. KAZINFORM — QHR astanasynda «Auto China 2026» halyqaralyq avtomobıl kórmesiniń resmı ashylýy ótti. Kórme 3 mamyrǵa deıin jalǵasady, dep jazdy Kazinform agenttiginiń Beıjińdegi menshikti tilshisi.
Ekspozıtsııa Shýnı aýdanyndaǵy ortalyqta jáne astanalyq kórme-kongress ortalyǵynda qatar uıymdastyrylǵan. Jalpy aýmaǵy 380 000 sharshy metrdi quraıtyn Beıjiń avtosalony salalyq kórmeler arasynda álemdegi eń aýqymdysy atandy.
Kórmege 21 el men óńirden 1451 avtokólik qoıylǵan. Bıyl álemdik premeralar sany 181-ge jetip, 2024 jylǵy 117 kórsetkishten asyp tústi. Ásirese bolashaq kóliginiń dızaıny men fýnktsıonaldyq múmkindikterin tanytatyn 71 kontsept-kar kópshiliktiń qyzyǵýshylyǵyn týdyrdy.
Jańalyqtar qatarynda nebári 5 mınýtta qýattyń 80%-yn toltyra alatyn asa jyldam zarıadtaý júıeleri bar. Tipti mınýs 30 gradýs temperatýrada da zarıadtaý ýaqyty tek 3 mınýtqa ǵana uzartady. Sonymen qatar kórmede ınnovatsııalyq qozǵaltqyshtar, avtonomdy júrgizý júıeleri jáne ózge de ozyq tehnologııalar usynylǵan.
Avtosalon jahandyq avtoónerkásip úshin sheshýshi kezeńde ótýde. Qazirgi ýaqytta naryqtaǵy iri oıynshylar tehnologııalyq kóshbasshylyq pen ınvestorlardyń nazaryn aýdarý úshin belsendi básekege túsip jatyr. Uıymdastyrýshylardyń boljamynsha, «Auto China 2026» kórmesine 1 mıllıonnan astam adam keledi.
Buǵan deıin Qytaıda 2026 jyldyń naýryz aıynda avtokólik óndirisi men satylymy aqpanmen salystyrǵanda aıtarlyqtaı óskenin jazǵan bolatynbyz.
