«Beıneý – Sekseýil» jolynyń ekonomıkalyq qana emes, áleýmettik mańyzy da orasan – Qarın
ASTANA. KAZINFORM – Prezıdent Ákimshiligi basshysynyń birinshi orynbasary Erlan Qarın Prezıdent Qasym-Jomart Toqaevtyń qatysýymen birneshe strategııalyq mańyzy bar jol qurylysy jobasynyń bastalýyn tarıhı oqıǵa dep baǵalady.
— Búgin úlken tarıhı oqıǵaǵa kýá boldyq. Memleket basshysy Qasym-Jomart Toqaevtyń ruqsatymen birneshe strategııalyq mańyzy bar jobanyń qurylysy bastaldy. Osylaısha, Qyzylordadan Sekseýilge deıingi, Sekseýilden Ulǵaısynǵa deıingi joldar keńeıtiledi. Al Sekseýilden Beıneýge deıin múlde jańa jol salynady.
«Beıneý — Sekseýil» jolynyń qajet ekeni jóninde Prezıdent 2021 jyly Aqtaýda ótken jıynda aıtqan bolatyn. Sodan beri tıisti esepteýler, zertteýler, qarjy kózderin naqtylaý sekildi mańyzdy máseleler pysyqtaldy. Mine, búgin qurylysy bastaldy.
Onyń birneshe ereksheligi men mańyzdylyǵy bar, — dedi Erlan Qarın.
Erlan Qarın Memleket basshysy elimizdiń transporttyq júıesin túbegeıli ózgertip jatqanyn aıtty.
— Birinshiden, joǵaryda aıtqanymdaı, bul — múlde jańa jol. Osyǵan deıingi jobalar negizinen buryn salynǵan joldardy jańartýmen, keńeıtýmen shekteletin. Al «Beıneý — Sekseýil» — múldem jol túspegen baǵyt. Sóıtip, Qazaqstan kartasynda jańa jol paıda bolady. Bul joba bizdiń qurylysshylar men jol mamandary úshin de úlken tájirıbe ári mańyzdy synaq bolmaq.
Ekinshiden, Qazaqstandaǵy negizgi joldardyń bári kezinde ońtústikten soltústikke qaraı salynǵan. Temir joldardyń da, avtomobıl joldarynyń da negizgi baǵyty solaı qurylǵan. Al Memleket basshysy elimizdiń transporttyq júıesin túbegeıli ózgertip jatyr. Óńirlerdi kóldeneńnen baılanystyrýǵa nazar aýdaryp otyr.
Úshinshiden, bul — túbekte ornalasqan Mańǵystaý óńiri úshin erekshe mańyzy bar joba. Osyǵan deıin Aqtaýǵa jetý úshin Aqtóbe, Oral, Atyraý óńirlerin basyp ótý kerek edi. Bul qaı jaǵynan bolsyn, aıtarlyqtaı qıyndyq týdyratyn.
Al tóte jol salynǵannan keıin ońtústik jáne ortalyq óńirlerdiń shalǵaıdaǵy Mańǵystaýmen baılanysy aıtarlyqtaı jeńildeıdi. Taýar, azyq-túlik jetkizý máselesi retteledi. Adamdardyń bir óńirden ekinshisine qatynaýy jaqsarady. «Beıneý — Sekseýil» jolynyń ekonomıkalyq qana emes, áleýmettik mańyzy da orasan, — dedi ol.
Bul bastama eldiń áleýetin eselep arttyratyn jáne ıgiligin mıllıondaǵan adam kóretin joba bolmaq
— Memleket basshysy salynatyn jańa joldyń oblysaralyq emes, aımaqtyq jáne qurlyqtyq mańyzyn eskere otyryp, ony «Aral-Kaspıı magıstrali» dep ataýdy usyndy.
Prezıdenttiń tarıhı mańyzy zor bastamasy eldiń áleýetin eselep arttyratyn jáne ıgiligin mıllıondaǵan adam kóretin joba bolmaq. Qazaqstannyń praım erasy bastalǵanyn osyndaı ólshemder de dáleldeıdi.
Memleket basshysy aıtqandaı, Qazaqstan úlken qurylys alańyna aınalyp keledi, — dep jazdy Erlan Qarın.
Aıta ketelik Qasym-Jomart Toqaev úsh strategııalyq mańyzdy avtomobıl jolynyń qurylysyn bastap bergen edi.
