Berlınde Dımash Qudaıbergenge arnalǵan sýret kórmesi ótip jatyr
ASTANA. KAZINFORM – Dımash Qudaıbergenniń 12-17 qarasha aralyǵyndaǵy Eýropadaǵy jeke kontsertteri aıasynda Berlınde «JULDYZ» atty ánshige arnalǵan kartınalar kórmesi ótedi, dep habarlaıdy Kazinform dimashnews.com saıtyna silteme jasap.
Kórme ótip jatqan Erster Erster galereıasy 14 qarashada «Stranger» shoýy bolǵan Maks-Shmelıng-Galle mańynda ornalasqan.
Sýretshi Pýnktgelıaýttyń maıly boıaýmen jáne qaryndashpen salǵan sýretteri Dımashtyń shyǵarmashylyq ómirindegi túrli oqıǵalardy beıneleıdi.
Sýretshi kórmege Dımashtyń sýretterin ǵana emes, sondaı-aq Raýshan Qudaıbergen men Rasýl Ýsmanovtyń atmosferalyq portretterin de qoıǵan.
– Bul beıneler Dımashtyń mýzykalyq fenomennen de asyp túsetin erekshe qabiletterin kórsetedi. Dúnıe júzindegi kontserttik gastroldik saparlarymen qatar, ol óz únin áleýmettik máselelerge arnaıdy: Dımash beıbitshilik pen bilimniń jaqtaýshysy, jas mýzykalyq talanttardyń qoldaýshysy jáne elin, Qazaqstandy dáriptep júrgen azamat, - deıdi basty keıipkeriniń san qyrly beınesin kópshilikke usynǵan avtor.
Kórmege kirý tegin. Kartınalardy satýdan túsken qarajattyń jartysy BUU-nyń turaqty damý maqsattaryn Qazaqstandaǵy bilim men qorshaǵan ortaǵa nazar aýdara otyryp júzege asyratyn «Sábı» qaıyrymdylyq qoryna aýdarylady.
Osyǵan deıin Ispanııada Dımashpen án shyrqaǵan qazaq qyzy áserimen bóliskenin jazǵan edik.