Berdibek Saparbaev Tájikstan elshisin qabyldady
Oblys ákimi elderdiń óńirleri arasyndaǵy yntymaqtastyqty nyǵaıtý qajettigin atap ótti. Bul usynys Jambyl jerine alǵash ret kelgen elshi tarabynan da qoldaý tapty. Haırýllo Ibodzoda oblystyń áleýeti men múmkinshiligine qatysty saýal joldady.
Berdibek Saparbaev qonaqqa oblystyń agrarly-ındýstrııaldy aımaq ekendigin aıtyp, negizgi baǵyttarymen tanystyrdy. Eginshilik jáne mal sharýashylyǵy boıynsha úlken áleýetke ıe óńirde mıneraldy tyńaıtqyshtar óndirisi damyp kele jatqanyn tilge tıek etti.
«Qazaqstan men Tájikstan ekeýi de Azııa elderi bolǵandyqtan, bizge ortaq dúnıeler kóp. Eki jaqtyń da múddeleri toǵysady. Bizde ekonomıkanyń túrli salalarynda, atap aıtsaq aýylsharýashylyǵy, ónerkásip, týrızm boıynsha ózara yntymaqtastyq ornatýǵa múmkindik jetkilikti, ony tıimdi paıdalanýymyz qajet», - dedi B.Saparbaev.
Óz kezeginde Haırýllo Ibodzoda Tájikstan jastaryn Qazaqstannyń joǵary oqý oryndaryna, onyń ishinde Taraz qalasyna oqýǵa jiberýge nıetti ekenin atap ótti.
Sonymen qatar, Tájikstan taraby Qazaqstanda eki kóterme-taratý ortalyǵyn ashýdy josparlap otyr. Elshi ondaı ortalyqtyń birin bizdiń oblystan salýǵa usynys bildirdi. Oblys ákimi bul bastamany qoldap, orynbasary Almas Mádıevke osy másele aıasynda zerdeleý jumystaryn júrgizýdi tapsyrdy.
Sondaı-aq, kezdesýde týrızm baǵytyndaǵy yntymaqtastyqtyń bolashaǵy zor ekendigi aıtyldy. Bul oraıda Tarazdyń – tarıhy tereń qalalardyń biri ekendigine aıryqsha nazar aýdaryldy. Tájikstan elshisi týrıster birden birneshe kóne qalalardy erkin aralaýy úshin Ortalyq Azııa elderine biryńǵaı vıza jasaý ıdeıasymen bólisti.
Aıta keteıik, Qazaqstan men Tájikstan arasynda tyǵyz qarym-qatynas oń jolǵa qoıylǵan. Pandemııaǵa qaramastan, ótken jyly eki memleket arasyndaǵy taýar aınalymy 910 mıllıon dollardy quraǵan.